బషీర్బాగ్, వెలుగు: ఫీజు రీయింబర్స్ మెంట్ పథకాన్ని యథావిధిగా అమలు చేయాలని, లేనిపక్షంలో ప్రభుత్వానికి తగిన బుద్ధి చెబుతామని రాజ్యసభ సభ్యుడు, బీసీ సంక్షేమ సంఘం జాతీయ అధ్యక్షుడు ఆర్. కృష్ణయ్య హెచ్చరించారు. శనివారం బషీర్ బాగ్ ప్రెస్ క్లబ్లో జరిగిన జాతీయ బీసీ సంక్షేమ సంఘం సమావేశంలో ఆయన మాట్లాడారు.
ఈ పథకాన్ని నీరుగార్చేలా తెచ్చిన జీవో నంబర్ 7ను వెంటనే ఉపసంహరించుకోవాలని, పెండింగ్లో ఉన్న రూ. 8 వేల కోట్ల ఫీజు బకాయిలను విడుదల చేయాలని డిమాండ్ చేశారు. బీసీ విద్యార్థుల ఉన్నత చదువులను అడ్డుకోవాలని చూస్తే ప్రభుత్వ పతనం తప్పదని హెచ్చరించారు. ఈ సమావేశంలో జాతీయ బీసీ సంక్షేమ సంఘం రాష్ట్ర వర్కింగ్ ప్రెసిడెంట్గా వంశీ మోహన్ యాదవ్ ప్రమాణ స్వీకారం చేయగా, మండలి ప్రతిపక్ష నేత మధుసూధనచారి, నాయకులు నారగోని, కత్తి వెంకటస్వామి, డా. అరుణ్ కుమార్, గుజ్జ సత్యం పాల్గొన్నారు.
