ఆకాశానికి అద్దెలు.. మరి తగ్గేదెప్పుడు!

మిడిల్క్లాస్ ఎదురుచూపులు
అన్ని మెట్రో సిటీల్లోనూ ఇదే పరిస్థితి
బెంగళూరులో ఇండ్లు అద్దెకిచ్చేందుకు సైతం ఇంటర్వ్యూలు
ఏడాదిలో 40 శాతం పెరిగిన రెంట్
ఉద్యోగులందరూ తిరిగి రావడంతో గిరాకీ

బిజినెస్ డెస్క్, వెలుగు: దేశంలోని ప్రధాన సిటీలలో అద్దెలు ఆకాశాన్నంటుతున్నాయి. ఒక వైపు వర్క్ఫ్రమ్ హోమ్ చాలు... ఆఫీసులకు రమ్మంటున్నాయి కంపెనీలు. మరోవైపు ఆకాశానికి చేరిన అద్దెలతో ఏం చేయాలో తోచని అయోమయం ఎదుర్కొంటున్నారు చాలా మంది ఉద్యోగులు. ఈ ఏడాది మొదటి ఆరు నెలల్లో ఏ ఇద్దరు ఉద్యోగులు కలిసినా ప్రధానంగా ఒకటే డిస్కషన్..అది పెరిగిన ఇంటి అద్దె గురించే. చాలా కంపెనీలు వర్క్ఫ్రం హోమ్ పాలసీకి ముగింపు పలకడమే ఈ అద్దెల పెరుగుదలకు ముఖ్యమైన కారణంగా చెప్పుకోవచ్చు.

అకస్మాత్తుగా పెరిగిన డిమాండ్ తట్టుకోవడానికి మార్కెట్లో తగినన్ని ఆప్షన్స్ కనబడటం లేదు. బెంగళూరు, ముంబై వంటి మెట్రోలలో అద్దెల పెరుగుదల భారీగా ఉండటంతోపాటు, అద్దెకు ఇండ్లు దొరకడమే కష్టమవుతోంది. బెంగళూరు, హైదరాబాద్, పుణె, ముంబై వంటి సిటీలలో ఉద్యోగుల వల్లే అద్దె ఇండ్లకు గిరాకీ పెరుగుతోంది. బ్యాంకింగ్, ఫైనాన్షియల్ సర్వీసెస్, ఇన్సూరెన్స్, సాఫ్ట్వేర్, ఫార్మాస్యూటికల్స్ రంగాలలోనే ఎక్కువ మంది ఉద్యోగాలు చేస్తున్నారు. ఏడాది కిందట కరోనా వైరస్ భయం తగ్గుముఖం పట్టడంతోనే ఉద్యోగులను ఆఫీసులకు రప్పించడానికి ప్రయత్నాలు మొదలు పెట్టాయి కార్పొరేట్ కంపెనీలు. కొవిడ్‌‌‌‌ వల్ల చాలా మంది ఉద్యోగులు అప్పట్లో సొంత ఊర్లలోని ఇండ్లకు వెళ్లిపోయారు. అలా వెళ్లిపోయిన వారిలో కొంత మంది అదే బాగుందని చెబుతుండగా, మరి కొంత మంది మాత్రం ఆఫీసులకు వెళ్లడమే మంచిదని పేర్కొంటున్నారు. ఇంకొంత మంది ఉద్యోగులు హైబ్రిడ్ ఆప్షన్ బెటరని అంటున్నారు. ప్రస్తుతం పరిస్థితులు చాలా వరకు కొవిడ్ ముందు లెవెల్కు మారిపోయాయి. దీంతో రెసిడెన్షియల్ హౌసింగ్ మార్కెట్ డిమాండ్ ఎక్కువైంది. అద్దెకు దొరికే ఇండ్లు తగినంతగా లేకపోవడంతో ఉద్యోగుల కష్టాలు కూడా పెరిగాయి.

ఇండ్ల సప్లయ్ కొరత....

కొవిడ్‌‌‌‌–19 టైములో నిర్మాణ కార్యకలాపాలు దాదాపుగా నిలిచిపోయాయి. ఫలితంగా సప్లయ్ తగ్గిపోయింది. మరోవైపు నిర్మాణం పూర్తయిన ఇండ్ల కొనుగోలుకు కస్టమర్లు ముందుకు రాలేదు. ఎనరాక్ డేటా ప్రకారం దేశంలో 2014 తర్వాత అమ్ముడవక మిగిలిపోయిన ఇండ్ల సంఖ్య 2023 లోనే అతి తక్కువగా ఉంది. ఇండియా సిలికాన్ వ్యాలీగా పేరొందిన బెంగళూరులో రెసిడెన్షియల్ రెంటల్స్ కొవిడ్‌‌‌‌ ముందు లెవెల్స్తో పోలిస్తే ఏకంగా 40 శాతం పెరిగాయి.

అద్దె ఇండ్లకు డిమాండ్– అద్దెల పెరుగుదల విషయంలో దేశంలోని ఏడు సిటీలలో బెంగళూరు టాప్ ప్లేస్లో నిలుస్తున్నట్లు డేటా చెబుతోంది. కొవిడ్‌‌‌‌ ముందు లెవెల్ కంటే అద్దె ఇండ్ల డిమాండ్ చాలా ఎక్కువగా పెరిగినట్లు ఎనరాక్ రీసెర్చ్ హెడ్ ప్రశాంత్ ఠాకూర్ చెప్పారు. చాలా హౌసింగ్ సొసైటీలలో ఖాళీ ఇండ్లే కనబడటం లేదని, కొవిడ్‌‌‌‌ ముందు లెవెల్తో పోలిస్తే అద్దెలు 30 శాతం అధికమయ్యాయని కూడా ఆయన పేర్కొన్నారు. కొత్త అకడమిక్ ఇయర్ మొదలవడంతో అద్దె ఇండ్లకు డిమాండ్ మరింత జోరయింది.

ఓనర్ల అత్యాశతో చుక్కలంటుతున్న అద్దెలు...

బెంగళూరులోని తానిసంద్ర మెయిన్రోడ్, మరాఠాహళ్లి ఓఆర్ఆర్ ప్రాంతాలలో అద్దెలు ఏడాది కాలంలోనే ఏకంగా 24 శాతం పెరిగిపోయాయి. పరిస్థితి ఎంత అధ్వాన్నంగా మారిపోయిందంటే ఇండ్ల ఓనర్లు అద్దెకు దిగే వారిని ఇంటర్వ్యూలు చేసేదాకా. గుగుల్ లాంటి కంపెనీల తరహాలో ఇంటర్వ్యూలు చేస్తున్నారు.

మంచి లైఫ్స్టైల్ కోరుకోవడం వల్లే..

కొవిడ్‌‌‌‌–19 తర్వాత కుటుంబాల ఆలోచనా ధోరణి మారిందని, అందుకు తగినట్లుగా చాలినన్ని ఇండ్లు దొరకడం లేదని కొంత మంది రియల్టర్లు కంప్లెయింట్ చేస్తున్నారు. ఒకవైపు సప్లయ్ చాలినంతగా లేకపోవడం...మరో వైపు కార్పొరేట్ ఉద్యోగులు తిరిగి రావడంతో నేషనల్ క్యాపిటల్ రీజియన్(ఎన్సీఆర్)లో ఇండ్ల అద్దెలు గత ఏడాది కాలంలో 25 నుంచి 40 శాతం దాకా ఎక్కువయ్యాయి.దేశంలో ధరల పెరుగుదలను కట్టడి చేసేందుకు తీసుకుంటున్న చర్యలు కూడా ఈ సమస్యను మరికొంత జటిలం చేస్తున్నాయి. గతంలో ఇండ్లు కొందామనుకున్న వారు కూడా ఇప్పుడు ముందు అద్దెకు తీసుకుని, ఆ తర్వాత కొనుక్కుందామనుకుంటున్నారని ఎన్సీఆర్లోని ఒక రియల్టర్ చెప్పారు. ప్రాపర్టీల రేట్లు, వడ్డీ రేట్లు రెండూ పెరగడంతో ఇండ్ల కొనుగోలు కొంత కష్టమవుతోంది. ఉద్యోగులందరూ ఆఫీసులకు రావాలని కార్పొరేట్ కంపెనీలు కోరుకుంటుంటే.. బిల్డర్లు అధిక వడ్డీ రేట్ల సమస్యతో సతమతమవు తున్నారు. దీంతో ఇండ్ల అద్దెలు ఇప్పట్లో దిగి వచ్చే సూచనలేవీ కనబడటం లేదు.