- ఎఫ్సీఐ తనిఖీల్లో కుంభకోణం బయటపడింది
- ఏటా వేల కోట్ల దందా
- మిల్లర్లతో టీఆర్ఎస్ ముఖ్యనేతల కుమ్మక్కు
హైదరాబాద్, వెలుగు:రాష్ట్రంలో ధాన్యం విషయంలో సర్కార్, రైస్ మిల్లర్లు కుమ్మక్కై పెద్ద ఎత్తున అవినీతికి పాల్పడ్డారని, దీనిపై సీబీఐతో సమగ్ర విచారణ జరిపించాలని కేంద్ర మంత్రి కిషన్ రెడ్డికి పీసీసీ చీఫ్ రేవంత్ రెడ్డి సవాల్ విసిరారు. టీఆర్ఎస్ సర్కార్లోని కొందరు ముఖ్యనేతలు మిల్లర్లతో కుమ్మక్కై ఏటా వందల కోట్ల రూపాయల కుంభకోణానికి పాల్పడుతున్నారన్నారు. ఎఫ్సీఐ తనిఖీల్లో ఈ విషయం బయటపడిందన్నారు. కేంద్ర మంత్రి కిషన్ రెడ్డికి ఈ విషయం తెలుసని, ఆయన కూడా మీడియా ముందు వెల్లడించారన్నారు. అందుకే ఈ విషయంపై దర్యాప్తు కోరుతున్నానన్నారు. గురువారం కిషన్ రెడ్డికి రేవంత్ బహిరంగ లేఖ రాశారు.
రేషన్ బియ్యం రిసైక్లింగ్
ఈ ఏడాది మార్చి 22, 24 తేదీల్లో ఎఫ్సీఐ అధికారులు క్షేత్ర స్థాయిలో తనిఖీలు చేసినపుడు కస్టమ్ మిల్లింగ్ రైస్ (సీఎంఆర్) కింద ఇచ్చిన ధాన్యంలో 4, 53, 896 బస్తాలు గోల్మాల్ అయినట్లు గుర్తించారని రేవంత్ లేఖలో పేర్కొన్నారు. 2020–21 యాసంగి, 2021–22 వానా కాలానికి సంబంధించిన ధాన్యం విషయంలో అధికారులు తనిఖీలు చేపట్టారని వివరించారు. దీన్నిబట్టి ప్రభుత్వం సీఎంఆర్ కింద కేటాయించిన వడ్లను మిల్లర్లు బియ్యంగా మార్చి ఎఫ్సీఐకి సరఫరా చేయకుండా, మార్కెట్లో అధిక ధరకు అమ్ముకొంటున్నారని అర్థం మవుతోందన్నారు. ఇలా ప్రతి ఏటా 30 శాతం మేర అక్రమాలు జరుగుతున్నట్లు అధికారులు గుర్తుంచారని చెప్పారు. ఒప్పందం ప్రకారం ఇవ్వాల్సిన రబీ బియ్యంలో తెలంగాణ సర్కార్ 8.34 లక్షల మెట్రిక్ టన్నులు ఇంత వరకు అందజేయలేదన్నారు. ఈ మొత్తం వ్యవహారంలో ప్రభుత్వ పెద్దలకు కూడా వాటా ఉందని, ఇది వందల కోట్ల కుంభకోణమని రేవంత్ ఆరోపించారు. ఈ విషయాలన్నింటిపై కేంద్ర మంత్రి కిషన్ రెడ్డికి స్పష్టమైన అవగాహన ఉందని, ఈ రైస్ అంతా ఎటు పోయిందని, విదేశాలకు ఎగుమతి చేస్తున్నారా లేదా బ్లాక్లో అమ్ముకుంటున్నారా అని స్వయంగా ఆయనే ప్రశ్నించారన్నారు. రాష్ట్రంలో బియ్యం కుంభకోణం జరుగుతోందని ఆయనకు స్పష్టమైన అవగాహన ఉందన్నారు. ఎఫ్సీఐకి చేరాల్సిన బియ్యాన్ని బహిరంగ మార్కెట్లో అమ్ముకుంటూ, రేషన్ బియ్యన్ని రీసైక్లింగ్ చేసి ఎఫ్సీఐకి సరఫరా చేస్తున్నారన్నారు. రాష్ట్రంలో 3,200 రైస్ మిల్లులున్నాయని, ఇందులో 900 మిల్లులను తనిఖీ చేస్తే రూ.400 కోట్ల కుంభకోణం బట్టబయలైందని చెప్పారు. ఎనిమిదేండ్లుగా ఈ తంతు జరుగుతోందన్నారు. అధికార పార్టీ నేతల అండదండలతోనే ఈ పని జరుగుతోందని అన్నారు. ఇంత పెద్ద కుంభకోణంపై స్పష్టమైన సమాచారం ఉన్నా ఇంకా ఎందుకు సైలెంట్గా ఉన్నారని కిషన్ రెడ్డిని ప్రశ్నించారు. వెంటనే ఈ కుంభకోణంపై సీబీఐ విచారణ జరిపించి ఆయన తన నిజాయితీని నిరూపించుకోవాలని రేవంత్ డిమాండ్ చేశారు. బాధ్యులైన మిల్లులను సీజ్ చేసి, రెవెన్యూ రికవరీ యాక్టు కింద ఇన్నేళ్ల దోపిడీ సొమ్మును వసూలు చేయాలని డిమాండ్ చేశారు.
