- అలియాబాద్లోబైక్ చెట్టుకు ఢీకొని ఇద్దరు..
- చేవెళ్ల పరిధిలో ముగ్గురు మృత్యువాత..
- దుండిగల్లో ఒకరు.. వికారాబాద్జిల్లాలో మరొకరు
శామీర్పేట్/ చేవెళ్ల, వెలుగు: రాష్ట్రంలోని వేర్వేరు ప్రాంతాల్లో జరిగిన రోడ్డు ప్రమాదాల్లో ఏడుగురు మృతిచెందారు. జార్ఖండ్ కు చెందిన సుమిత్ కుల్లు (22), ఇతడి స్నేహితుడు కాస్మోస్ మార్కి (22) ఆదివారం తమ కంపెనీలో నిర్వహించిన దసరా వేడుకల్లో పాల్గొన్నారు. వేడుకలు ముగిశాక బైక్పై బయటకు వెళ్లగా అలియాబాద్ బృంద కన్వెన్షన్ హాల్ సమీపంలో అదుపు తప్పి చెట్టును ఢీకొట్టారు.
ఈ ప్రమాదంలో ఇద్దరూ అక్కడికక్కడే చనిపోయారు. రోడ్డు ప్రమాద దృశ్యాలు సీసీ కెమెరాలో రికార్డయ్యాయి. రంగారెడ్డి జిల్లా చేవెళ్ల మండలం నాంచేరి గ్రామానికి చెందిన రైతు అలూరి కిష్టయ్య(42) బైక్పై ఆలూరుకు వెళ్తుండగా.. మరో బైక్ఢీకొట్టింది. తీవ్ర గాయాలతో కిష్టయ్య మృతిచెందగా.. మరొక వ్యక్తి మహిపాల్కు గాయాలయ్యాయి. అలాగే, శంకర్పల్లి మండలం సింగాపురానికి చెందిన బండారి మొగులయ్య (48) ఆదివారం రాత్రి బైక్పై సంగారెడ్డి వైపు వెళ్తున్నాడు. కంది బైపాస్‌‌‌‌లోని ల్యాంకో సమీపంలో రోడ్డు ఇరుకుగా ఉన్న చోట బైక్ అదుపుతప్పి కిందపడిపోయాడు. అదే సమయంలో వెనుక నుంచి వచ్చిన గుర్తుతెలియని వాహనం అతని తలపై నుంచి వెళ్లడంతో స్పాట్లోనే చనిపోయాడు. అలాగే అలంఖాన్ గూడ గ్రామానికి చెందిన భుజంగారెడ్డి (55) సోమవారం ఉదయం బైక్పై వెళ్తుండగా, హుస్సేన్‌‌‌‌పూర్ వద్ద అదుపు తప్పి కిందపడడంతో చనిపోయాడు.
మద్యం తాగి.. కారును ఢీకొట్టి..
కుత్బుల్లాపూర్/తాండూరు: సంగారెడ్డి జిల్లా గుమ్మడిదల మండలం అన్నారం గ్రామానికి చెందిన కావలి రాజేశ్(30), పల్నాటి రాకేశ్ మిత్రులు. ఆదివారం కారులో గండిమైసమ్మకు వెళ్లి తిరిగొస్తుండగా రాత్రి గాగిల్లాపూర్ లోని టాటా హిటాచీ కంపెనీ వద్దకు రాగానే ఎదురుగా వచ్చిన బొలేరో ఢీకొట్టింది. ఈఘటనలో కారు నడుపుతున్న రాజేశ్ మృతిచెందగా..రాకేశ్కి తీవ్రగాయాలయ్యాయి. బొలేరో నడిపిన డ్రైవర్ సేతు మద్యం సేవించి ఉన్నట్లు పోలీసుల విచారణలో తేలింది. వికారాబాద్ జిల్లా యాలాలకు చెందిన గొల్ల రాజశేఖర్ (32) ఆదివారం ట్రాక్టర్‌‌‌‌తో మొరం తరలిస్తుండగా..యాలాల శివారులోని కస్తూర్బా గాంధీ స్కూల్మలుపు వద్ద ట్రాక్టర్ అదుపుతప్పి బోల్తా పడింది. ట్రాక్టర్ టైరు రాజశేఖర్ పై నుంచి వెళ్లడంతో తీవ్రంగా గాయపడ్డాడు. తాండూరు ప్రభుత్వ దవాఖానకు, అక్కడి నుంచి హైదరాబాద్‌ తీసుకెళ్తుండగా మృతి చెందాడు.
