డ్రోన్లు అంటే గాల్లో ఎగురుతాయి. కావాల్సిన ఫొటోలు, వీడియోలు తీస్తాయి. ఇప్పుడు వస్తువులు డెలివరీ కూడా చేస్తున్నాయి. వాటిని నేల మీద వాడలేం. కానీ ‘లియో’ అనే ఈ డ్రోన్ తో ఈ పనులన్నీ చేయొచ్చు. ఆపరేటర్ కమాండ్స్ను బట్టి ఈ బుల్లి డ్రోన్ గాల్లో ఎగరడంతో పాటు నేల మీద నడుస్తుంది కూడా..
లియో అనే ఈ కొత్తరకమైన డ్రోన్ను అమెరికాకు చెందిన సెంటర్ ఫర్ అటానమస్ సిస్టమ్స్ అండ్ టెక్నాలజీ ( కాస్ట్) తయారు చేసింది. గాల్లో ఎగురుతూ ఫొటోలు, వీడియోలు తీస్తుంది. నేలమీద నడుస్తూ కూడా ఈ పనులు చేస్తుంది. ఇప్పటి వరకు ఇలా రెండు రకాలుగా పని చేసే డ్రోన్లు రాలేదు. దీంతో పాటు తాడుపై సర్కస్, స్కేట్ బోర్డుపై ఫీట్లు కూడా చేస్తుంది లియో. దీనికి కాళ్లు ఉంటాయి. భుజాల దగ్గర లిఫ్టింగ్ ఫ్యాన్లు ఉంటాయి. దీని ఎత్తు రెండున్నర ఫీట్లు. ఆపరేటర్ కమాండ్స్ను పాటిస్తూ నడిచే చోట నడుస్తూ.. అవసరమైన చోట డ్రోన్గా మారి పైకి లేస్తుంది. ఇది సెకనుకు 20 సెంటీమీటర్ల దూరం నడవగలదు.
దీనికి హైబ్రిడ్ మూవ్మెంట్ పవర్ సప్లయ్ ఉంటుంది. దీనివల్ల ఒక చోటు నుంచి మరో చోటుకి కదులుతుంది. మెట్లు కూడా ఎక్కగలుగుతుంది. ఈ డ్రోన్ తయారీకి‘ఆకాశంలో ఎగురుతూ, నేల మీద నడుస్తూ తమ అవసరాలకు తగ్గట్టు మారే పక్షులే ఇన్స్పిరేషన్’ అని చెబుతోంది కాస్ట్ టీమ్. మామూలు డ్రోన్లకు బ్యాటరీ లిమిట్స్ ఉంటాయి. కానీ లియోకి అలా ఉండదని అంటున్నారు. హై వోల్టేజ్ లైన్లను టెస్ట్ చేయడానికి, స్పేస్ సెంటర్లలో కొన్ని క్రిటికల్ ప్లేస్లకు దీన్ని పంపేందుకు వీలుంది. అయితే మార్కెట్లోకి ఎప్పుడు అందుబాటులోకి వస్తుంది? దీని రేటు ఎంత అనే విషయాలు ఇంకా చెప్పలేదు.
