ఫుడ్ సేఫ్టీ డిపార్ట్మెంట్ చర్యలతో ఎఫ్‌ఎంసీజీ దిగ్గజం నెస్లే ఇండియాకు ఎదురుదెబ్బ తగిలింది. నిబంధనలు సరిగా పాటించలేదనే కారణంతో ఆ సంస్థపై లీగల్ కేసులు నమోదయ్యాయి. ఈ వార్త బయటకు రావటంతో సెప్టెంబర్ 18న స్టాక్ మార్కెట్లో నెస్లే షేర్లు 2 శాతానికి పైగా నష్టపోయాయి.
మూడు ఉత్పత్తులపై కేసులు..
నెస్లే కంపెనీకి చెందిన ఇన్ఫాంట్ న్యూట్రిషన్, నాన్ ఎక్సెలా ప్రో స్టేజ్ 1, లాక్టోజెన్ ప్రో 1 అనే ప్రొడక్ట్స్ పై FSSAI.. 3 వేర్వేరు కేసులు నమోదు చేసింది. ఆన్‌లైన్ వేదికలపై ఈ ఉత్పత్తుల సేల్స్ పెంచేందుకు చేస్తున్న యాడ్స్ పై ఫుడ్ సేఫ్టీ అథారిటీ తీవ్రంగా స్పందించింది.
బయోటిన్ లోపం..
నాన్ ఎక్సెలాలో.. 5 HMOs, వే ప్రోటీన్ అంశాలు ఉండగా, లాక్టోజెన్ విషయంలోనూ యాడ్స్ రూల్స్ ఉల్లంఘించినట్లు తేలింది. పసిపిల్లలకు ఇచ్చే ఆహారాన్ని అడ్వర్టైజ్‌మెంట్లు చేయడం, అమ్మకాలను పెంచేలా ప్రచారం చేయడం చట్టప్రకారం నేరం. ఇది 2020 FSS(Foods for Infant Nutrition) నిబంధనలతో పాటు IMS చట్టానికి విరుద్ధమని అధికారులు స్పష్టం చేశారు. ఈ ఫాలో-అప్ ఫార్ములా నమూనాలను ల్యాబ్‌లో పరీక్షించగా.. శిశువుల ఆరోగ్యానికి అత్యంత కీలకమైన బయోటిన్ మోతాదు తక్కువగా ఉన్నట్లు తేలింది. రెఫరల్ ల్యాబ్ పరీక్షల్లోనూ ఇదే విషయం రుజువైంది.
ALSO READ : సూపర్ బ్రేక్ ఫాస్ట్:వారానికి రెండు సార్లు..
పసిపిల్లల పోషకాహార విషయంలో ఎలాంటి రాజీ పడేది లేదని ఫుడ్ సేఫ్టీ డిపార్ట్మెంట్(FSSAI) స్పష్టం చేసింది. ఆహార భద్రతను కాపాడేందుకే ఈ కఠిన చర్యలు తీసుకున్నట్లు తెలిపింది. ఈ పరిణామాలు అన్ని ఆహార తయారీ కంపెనీలకు నిబంధనలు కచ్చితంగా పాటించాలనే హెచ్చరికగా మారింది.
నెస్లే ఇండియా స్పందన:
బేబీ ఫుడ్స్ వివాదంపై నెస్లే ఇండియా స్పందించింది. తమ శిశు ఆహార ఉత్పత్తులైన 'నాన్ ఎక్సెల్లా ప్రో', 'లాటోజెన్ ప్రో' లేబుల్స్‌పై వస్తున్న ఆరోపణలను ఖండించింది. తమ ఉత్పత్తులు వర్తించే అన్ని చట్టబద్ధమైన నిబంధనలకు పూర్తిగా అనుగుణంగా ఉన్నాయని నెస్లే అధికారికంగా స్పష్టం చేసింది. ఈ రెండు ఉత్పత్తులకు సంబంధించిన లేబుల్స్‌కు FSSAI నియమించిన నిపుణుల కమిటీ ద్వారానే అధికారిక ఆమోదం లభించిందని కంపెనీ స్పష్టం చేసింది. అధికారుల నుండి వచ్చిన నోటీసుకు తాము ఇప్పటికే పూర్తి సమాధానం ఇచ్చామని వెల్లడించింది.
లేబుళ్లపై ఉన్న సమాచారమంతా వాస్తవాలతో కూడుకున్నదని, శాస్త్రీయ ఆధారాలు, తగిన పరిశోధనల ద్వారానే వాటిని ముద్రించినట్లు నెస్లే తెలిపింది. వర్తించే అన్ని చట్టాల ప్రకారం నియమ నిబంధనలను, లేబుల్ డిక్లరేషన్లను తాము కచ్చితంగా పాటిస్తున్నట్లు కంపెనీ పునరుద్ఘాటించింది. వినియోగదారులలో అవగాహన కల్పించేందుకు FSSAI చేసే ప్రయత్నాలకు తాము ఎప్పుడూ సహకరిస్తామని, భవిష్యత్తులోనూ అధికారులతో కలిసి సన్నిహితంగా పనిచేస్తామని నెస్లే పేర్కొంది.
