ఆంధ్రప్రదేశ్‌లో ఎంపీటీసీ, జెడ్పీటీసీ ఎన్నికల నిర్వహణకు సంబంధించి రాష్ట్ర ప్రభుత్వం కీలక మార్పులు చేసింది. నవంబర్ 3న జరగాల్సిన ఎంపీటీసీ, జెడ్పీటీసీ ఎన్నికల పోలింగ్‌ను నవంబర్ 5వ తేదీకి వాయిదా వేసింది. నవంబర్ 7న ఓట్ల లెక్కింపు, ఫలితాలు విడుదల కానున్నాయి. ఈ మేరకు పంచాయతీరాజ్, గ్రామీణాభివృద్ధి శాఖ ఉత్తర్వులు జారీ చేసింది. ఎన్నికల విధుల్లో పాల్గొనే ఉద్యోగులు, సిబ్బంది తమ ఓటు హక్కును వినియోగించుకునేందుకు వీలుగా ప్రభుత్వం ఈ నిర్ణయం తీసుకుంది. ఎన్నికల విధుల్లో పాల్గొనే సిబ్బందికి పోస్టల్ బ్యాలెట్ ద్వారా ఓటు వేసే అవకాశం కల్పించాలని అధికారులను ఆదేశించింది. ప్రభుత్వ తాజా ఉత్తర్వులతో ఎంపీటీసీ, జెడ్పీటీసీ ఎన్నికల షెడ్యూల్‌లో మార్పులు చోటుచేసుకున్నాయి.
సవరించిన షెడ్యూల్ ఇదే
- నవంబర్ 5 (గురువారం): ఎంపీటీసీ, జెడ్పీటీసీ ఎన్నికల పోలింగ్.
- నవంబర్ 6: అవసరమైన చోట రీపోలింగ్.
- నవంబర్ 7 (శనివారం): ఓట్ల లెక్కింపు, ఫలితాల ప్రకటన.
