చెట్లు, గుట్టలు... మధ్యలో గోదావరి నది. చెట్ల కొమ్మల మీద గెంతులు వేసే కోతులు, కిలకిలరావాలతో పలకరించే రకరకాల పక్షులు. ఇలాంటి వాతావరణంలో కొంచెంసేపు ఉన్నా మనసు తేలిక పడుతుంది. నేచర్ ఫొటోగ్రఫీని ఇష్టపడే వాళ్లకు, నేచర్ లవర్స్కు ఇలాంటి ప్లేస్ బాగా నచ్చుతుంది. పచ్చదనంతో ఆహ్లాదంగా ఉండే శివ్వారం వైల్డ్ లైఫ్ శాంక్చురీ కూడా అలాంటిదే. మంచిర్యాల జిల్లాలో ఉన్న ఈ శాంక్చురీకి వీకెండ్లో వెళ్తే ఎంజాయ్ చేయొచ్చు.
ఈ శాంక్చురీ గోదావరి నదీ పరివాహక ప్రాంతంలో ఉంది. దాదాపు 36 చదరపు కిలోమీటర్ల దూరంలో విస్తరించి ఉంది. ఇక్కడ స్పెషల్ అట్రాక్షన్ ఏంటంటే... మార్ష్ జాతి మొసళ్లు. ఈ మొసళ్లను సంరక్షించాలనే ఉద్దేశంతో ఈ శాంక్చురీని ఏర్పాటు చేశారు. ఇవి మంచినీళ్లలో ఎక్కువగా కనిపిస్తాయి. వీటిని ‘మగ్గర్ మొసళ్లు’ అని కూడా పిలుస్తారు. ఈ మొసళ్లు మిగతా మొసళ్ల కంటే ఎక్కువ దూరం నేల మీద పాక్కుంటూ వెళ్లగలవు. అంతేకాదు నీళ్లలో, నేల మీద కూడా మార్ష్ మొసళ్లు ఒకే వేగంతో వెళ్తాయట.
అరుదైన చెట్లు, జంతువులు
ఈ శాంక్చురీలో ఆకురాల్చే చెట్లు ఎక్కువగా కనిపిస్తాయి. తెల్ల మద్ది, నల్లమద్ది, నల్లకొడిశ వంటి ఔషధగుణాలున్న చెట్లతో పాటు టేకు, ముండ్ల జాతి చెట్లు బాగా ఉంటాయి. ఎలుగుబంటి, నీల్గాయ్, చిరుత, మచ్చల జింకలు, లంగూర్ కోతులు, మకాక్ జాతికి చెందిన రీసస్ కోతుల్ని చూడొచ్చు. ఇవేకాకుండా రంగురంగుల రామచిలుకలు, నెమళ్లు, గద్దలు కూడా కనిపిస్తాయి. ఇక్కడి వాచ్ టవర్ ఎక్కి చూస్తే ఈ శాంక్చురీ మొత్తం కనిపిస్తుంది. శాంక్చురీలో పక్షులు కిలకిలరావాలు వింటుంటే ఎంత దూరం నడిచినా అలసట తెలియదు. ఇక్కడ బోటు షికారు చేస్తూ గోదావరి నది, ఆ పక్కనే ఉన్న పచ్చని పంట పొలాల్ని చూస్తుంటే మనసు పులకరిస్తుంది.
ఇలా వెళ్లాలి
మంథని నుంచి 10 కిలోమీటర్ల దూరంలో ఉంది శివరాం వైల్డ్లైఫ్ శాంక్చురీ. మంచిర్యాల నుంచి 50 కిలోమీటర్ల జర్నీ. హైదరాబాద్ నుంచి అయితే దాదాపు 260 కిలోమీటర్లు.
టైమింగ్స్: ఉదయం 7 గంటల నుంచి రాత్రి 8:30 వరకు.
