మీకు స్లోఫీ తెలుసా..? సోఫీ తెలుసు.. కాఫీ తెలుసు.. ఈ స్లోఫీ ఏంటి? అని అంటారా? సెల్ఫీ కూడా తెలిసే ఉంటుంది కదా! ఇగో ఆ సెల్ఫీ లాంటిదే ఈ స్లోఫీ. అంటే స్లో మోషన్ సెల్ఫీ అన్నమాట. మొన్నామధ్య యాపిల్ కొత్త ఐఫోన్లను తీసుకొచ్చింది కదా. అదే, ఐఫోన్ 11 సిరీస్ ఫోన్లండి. ఆ ఫోన్లలోనే ఈ సరికొత్త స్లోఫీని తీసుకొచ్చింది యాపిల్ కంపెనీ. సెప్టెంబర్ 10న గ్రాండ్గా జరిగిన కార్యక్రమంలో ఈ ‘స్లోఫీ’ పదాన్ని, ఫీచర్ను ప్రముఖంగా చూపించింది కంపెనీ. అయితే, నెటిజన్లు మాత్రం ఆ పదాన్ని తీసుకోలేకపోతున్నారు. 2019లో చెత్త పదాల్లో ఇదొకటని సెటైర్లు పేలుస్తున్నారు. ఫీచర్ను పక్కనబెట్టేసి ఇదేం పదంరా బాబూ అంటూ కామెంట్లతో రెచ్చిపోతున్నారు. ప్లీజ్ బాబూ, దాన్ని తీసేయండి అంటూ సూచిస్తున్నారు.
