- మూసీ ప్రక్షాళనపై కేటీఆర్ అవినీతి ఆరోపణలు
- కాంగ్రెస్ ప్రతిష్టను దెబ్బతీసేలా ఉన్నాయని సుప్రీంలో ఆత్రం సుగుణ పిటిషన్
న్యూఢిల్లీ, వెలుగు: మూసీ ప్రక్షాళనపై అవినీతి ఆరోపణలు చేసిన బీఆర్‌‌ఎస్ వర్కింగ్ ప్రెసిడెంట్ కేటీఆర్కు సుప్రీంకోర్టు శుక్రవారం నోటీసులు జారీ చేసింది. మూసీ ప్రక్షాళన పేరుతో రూ.25 వేల కోట్లను రేవంత్ సర్కార్ దారి మళ్లించిందని గతంలో కేటీఆర్ ఆరోపణలు చేశారు. ఈ కామెంట్స్ కాంగ్రెస్ పార్టీ ప్రతిష్టను దెబ్బతీసేలా ఉన్నాయని ఆ పార్టీ నేత ఆత్రం సుగుణ ఆదిలాబాద్ జిల్లా ఉట్నూరు పోలీస్ స్టేషన్లో గతేడాది సెప్టెంబర్ 30న కేటీఆర్ పై ఫిర్యాదు చేయడంతో ఎఫ్ఐఆర్ నమోదు చేశారు.
ఈ వ్యవహారంలో తనపై అక్రమ కేసును బనాయించారని, ఈ కేసును కొట్టివేయాలని కేటీఆర్ హైకోర్టును ఆశ్రయించారు. ఈ పిటిషన్ పై విచారణ జరిపిన న్యాయస్థానం.. ఆ ఎఫ్ ఐఆర్ ను కొట్టివేస్తూ ఈ ఏడాది ఏప్రిల్ 21న తీర్పు వెలువరించింది. ఈ తీర్పును సవాల్ చేస్తూ ఆత్రం సుగుణ మే 19న సుప్రీంకోర్టును ఆశ్రయించారు. ఈ పిటిషన్ను జస్టిస్ సంజయ్ కరోల్ నేతృత్వంలోని జస్టిస్ సతీష్ చంద్ర శర్మతో కూడిన డివిజన్ బెంచ్ శుక్రవారం విచారించింది. ఆత్రం సుగుణ పిటిషన్కు సమాధానం ఇవ్వాలని ప్రతివాదులుగా ఉన్న కేటీఆర్, తెలంగాణ ప్రభుత్వానికి నోటీసులు జారీ చేసింది. తదుపరి విచారణను ఆగస్టు 25కు వాయిదా వేస్తున్నట్లు ధర్మాసనం పేర్కొంది.
