Suryakumar Yadav: రాంచీ వేదికగా వెస్టిండీస్‌తో జరిగిన రెండో టీ20 మ్యాచ్‌లో టీమిండియా ఓటమి అభిమానులను నిరాశపరిచినా.. భారత మాజీ టీ20 కెప్టెన్ సూర్యకుమార్ యాదవ్ (Suryakumar Yadav) కు సంబంధించిన ఓ ఆసక్తికరమైన వీడియో ప్రస్తుతం సోషల్ మీడియాలో తెగ వైరల్ అవుతోంది. మ్యాచ్‌లో తాను ఆడకపోయినా, టీవీలో మ్యాచ్‌ను వీక్షిస్తూ సూర్య స్వయంగా బౌలింగ్ వ్యూహాలు రచిస్తున్న తీరు అందరినీ ఆకట్టుకుంటోంది.
సూర్య క్యూట్ మూమెంట్‌:
భారత్ వర్సెస్ వెస్టిండీస్ మ్యాచ్‌ను సూర్యకుమార్ యాదవ్ తన ఇంట్లో కూర్చుని టీవీలో ఎంతో ఏకాగ్రతతో వీక్షించారు. మ్యాచ్ చివరి దశకు చేరుకున్న సమయంలో మిగిలిన ఓవర్లు, బౌలింగ్ ఆప్షన్లపై ఆయన తీవ్రంగా చర్చిస్తున్న క్యూట్ మూమెంట్‌ను ఆయన సతీమణి దేవిష శెట్టి (Devisha Shetty) తన కెమెరాలో బంధించి సోషల్ మీడియాలో పంచుకున్నారు. సూర్య ఒంటరిగా మ్యాచ్ చూస్తూ తనలో తాను మాట్లాడుకుంటున్న సమయంలో దేవిష వచ్చి అసలు ఏం మాట్లాడుతున్నావని ప్రశ్నించారు. దానికి స్పందించిన సూర్య.. మ్యాచ్‌లో కేవలం 5 ఓవర్లు మాత్రమే మిగిలి ఉన్నాయని, భారత్ ఆ ఓవర్లను ఎలా మేనేజ్ చేయాలనే దానిపై చర్చిస్తున్నట్లు తెలిపారు. అంతేకాకుండా, మ్యాచ్‌ను మలుపు తిప్పేది ఎవరంటూ "గేమ్ గుమాయేగా కౌన్? గుడ్డు?" అని అనడం నవ్వులు పూయించింది.
బౌలింగ్ వ్యూహాలపై సూర్య మాస్టర్ ప్లాన్:
ఈ వీడియోలో సూర్యకుమార్ యాదవ్ ఒక కెప్టెన్‌లా మైదానంలోని పరిస్థితులను విశ్లేషిస్తూ బౌలింగ్ ప్లాన్ వివరించారు. స్పిన్నర్లు కుల్దీప్ యాదవ్ (ముద్దుగా 'గుడ్డు' అని పిలుస్తూ), అక్షర్ పటేల్‌లతో పాటు మరో సీనియర్ బౌలర్‌కు ఒక్కో ఓవర్ కేటాయించవచ్చని ఆయన చెప్పారు. ఇక ఆఖరి రెండు ఓవర్ల కోసం పేసర్ మయాంక్ యాదవ్, అలాగే శివమ్ దూబేలను ఉపయోగించుకోవచ్చని తనదైన శైలిలో లెక్కలు వేశారు. జట్టుకు దూరంగా ఉన్నప్పటికీ, సూర్యకు క్రికెట్ పట్ల ఉన్న ఆసక్తి, అతడి మైండ్‌సెట్ ఈ వీడియో ద్వారా మరోసారి స్పష్టమైంది. అభిమానులు ఈ వీడియోను నెట్టింట విపరీతంగా షేర్ చేస్తూ తమదైన శైలిలో కామెంట్లు చేస్తున్నారు.
రాంచీ థ్రిల్లర్ మ్యాచ్ నేపథ్యం:
ఇక రాంచీలో జరిగిన రెండో టీ20 మ్యాచ్ విషయానికి వస్తే.. తొలుత బ్యాటింగ్ చేసిన భారత్ 20 ఓవర్లలో 5 వికెట్ల నష్టానికి 249 పరుగుల భారీ స్కోరు సాధించినప్పటికీ, వెస్టిండీస్ జట్టు కెప్టెన్ షాయ్ హోప్ (102*), షెర్ఫాన్ రూథర్‌ఫర్డ్ (84) చెలరేగి ఆడటంతో విండీస్ 6 వికెట్ల తేడాతో విజయం సాధించి, ఐదు మ్యాచ్‌ల సిరీస్‌ను 1–1 తేడాతో సమనం చేసేసింది.
