బౌలర్ల కెరీర్లతో ఆటలొద్దు.. భారత పిచ్‌లపై గంభీర్ తీవ్ర అసంతృప్తి.. 

Gautam Gambhir : రాంచీ వేదికగా జరిగిన రెండో టీ20 మ్యాచ్‌లో వెస్టిండీస్ చేతిలో ఘోర పరాజయం పాలైన తర్వాత భారత హెడ్ కోచ్ గౌతమ్ గంభీర్ (Gautam Gambhir) పిచ్‌ల తయారీ విధానంపై తీవ్ర ఆగ్రహం వ్యక్తం చేశారు. బ్యాటర్లకు విపరీతంగా సహకరిస్తూ, బౌలర్లకు నరకం చూపిస్తున్న ఫ్లాట్ పిచ్‌ల వల్ల బౌలర్ల కెరీర్లు ప్రమాదంలో పడుతున్నాయి, బ్యాట్-బాల్ మధ్య సరైన పోటీ ఉండాలని గంభీర్ ఆవేదన వ్యక్తం చేశారు. ఈ మ్యాచ్‌లో భారత్ నిర్దేశించిన 250 పరుగుల భారీ లక్ష్యాన్ని విండీస్ 9 బంతులు మిగిలి ఉండగానే ఛేదించిన సంగతి తెలిసిందే. ఈ మ్యాచ్‌లో మొత్తం 501 పరుగులు నమోదు కాగా.. ఏకంగా 33 సిక్సర్లు కొట్టారు.  

బౌలర్ల కెరీర్లతో ఆటలొద్దు: గౌతమ్ గంభీర్ ఆగ్రహం

పోస్ట్-మ్యాచ్ ప్రెస్ కాన్ఫరెన్స్‌లో గంభీర్ మాట్లాడుతూ పిచ్‌ల నాణ్యతపై ప్రశ్నలు గుప్పించారు. బ్యాట్‌కు, బాల్‌కు మధ్య సమానమైన పోటీని చూడాలనుకోవడం లేదా? ప్రేక్షకులు ఎలాంటి రోమాంచక మ్యాచ్ చూడాలనుకుంటున్నారో.. మేము కూడా దాన్నే కోరుకుంటున్నాం.. ఈ బౌలర్లు మన వాళ్లే, ఎక్కడి నుంచో రాలేదు.. ఈ డ్రెస్సింగ్ రూమ్‌లో కూర్చోవడానికి వారు ఎంతో కష్టపడ్డారు.. ఇలాంటి పిచ్‌ల వల్ల వారి కెరీర్లు నాశనమవుతాయని గంభీర్ మండిపడ్డారు. రాంచీలో ఫ్లాట్ పిచ్‌తో పాటు విపరీతమైన మంచు (Dew) కురవడంతో బౌలర్లకు బంతిపై గ్రిప్ దొరకలేదని, అయితే ఓటమికి వీటిని సాకులుగా చూపబోమని ఆయన తెలిపారు. 

మయాంక్ బౌలింగ్ పై గంభీర్ ప్రశంసలు: 

విండీస్ విధ్వంసం సృష్టించినా.. భారత యువ పేసర్ మయాంక్ యాదవ్ (Mayank Yadav) తన బౌలింగ్ తో ఆకట్టుకున్నాడు. 3 ఓవర్లలో 36 పరుగులు ఇచ్చి 3 వికెట్లు (కామిల్ పూరన్, షిమ్రాన్ హెట్మెయర్, రోవ్‌మన్ పొవెల్) పడగొట్టాడు. ఈ క్రమంలో గంటకు 149.5 కిలోమీటర్ల వేగంతో బంతులు విసిరాడు. ఇక మయాంక్ ఒక ఫాస్ట్ బౌలర్, అలాగే బౌలింగ్ చేయాలి.. గంటకు 150 కిమీ వేగంతో బౌలింగ్ చేయగల సామర్థ్యం ఉన్నప్పుడు దాన్నే ఉపయోగించాలని అన్నాడు. వైవిధ్యాల (Variations) పేరుతో వేగాన్ని తగ్గించుకోవాల్సిన అవసరం లేదని చెప్పుకొచ్చాడు. 

దూబేకి ప్రమోషన్, కోచ్ కామెంట్స్ వైరల్: 

* శివమ్ దూబే ప్రమోషన్ సమర్థన: నాలుగో స్థానంలో శ్రేయస్ అయ్యర్ కంటే ముందే శివమ్ దూబేను పంపడాన్ని కోచ్ గంభీర్ సమర్థించుకున్నారు. టీ20 క్రికెట్‌లో ఓపెనర్లు మినహా మిగతా బ్యాటింగ్ ఆర్డర్ ఫ్లెక్సిబుల్‌గా ఉంటుందని, గతంలో దూబే నాలుగో స్థానంలో వచ్చి మ్యాచ్‌లను గెలిపించాడని తెలిపారు. 

* షాయ్ హోప్ బ్యాటింగ్‌పై కామెంట్స్: తొలి ఓవర్లోనే 2 వికెట్లు, పవర్‌ప్లేలో 3 వికెట్లు కోల్పోయినప్పటికీ.. విండీస్ కెప్టెన్ షాయ్ హోప్ (102 నాటౌట్), షెర్ఫేన్ రూథర్‌ఫోర్డ్ (84) ఆడిన తీరు అద్భుతమని గంభీర్ కొనియాడారు. ఈ ఓటమితో ఐదు మ్యాచ్‌ల సిరీస్ 1-1తో సమం కాగా.. ఇరు జట్ల మధ్య మూడో టీ20 మ్యాచ్ ఇండోర్ వేదికగా ఆదివారం (అక్టోబర్ 11న) నాటు జరగనుంది.