ఇండియన్ టెక్ నిపుణులను ఉద్దేశించి అమెరికా ఉపాధ్యక్షుడు జేడీ వాన్స్ చేసిన వ్యాఖ్యలపై భారత విదేశాంగ శాఖ తీవ్ర అభ్యంతరం వ్యక్తం చేసింది. అమెరికా ఆర్థికాభివృద్ధి, సాంకేతిక రంగంలో భారతీయ నిపుణులు కీలక పాత్ర పోషిస్తున్నారని స్పష్టం చేసింది. అమెరికాలో విదేశీ టెక్ నిపుణులను కించపరిచేలా మాట్లాడటం సరికాదని విదేశాంగ శాఖ ప్రతినిధి రణధీర్ విమర్శించారు.
అమెరికాలోని కొన్ని టెక్నాలజీ కంపెనీలను శాశ్వత కార్మిక ధృవీకరణ (PERM) కార్యక్రమం నుంచి సస్పెండ్ చేసిన క్రమంలో భారత్ ఈ వివరణ ఇచ్చింది. అక్టోబర్ 9న జరిగిన ఓ మీడియా సమావేశంలో విదేశాంగ శాఖ ప్రతినిధి రణధీర్ జైస్వాల్ మాట్లాడుతూ.. PERM, H-1B వీసా కార్యక్రమాలు వేర్వేరని అన్నారు. PERM దరఖాస్తుల నిలిపివేత వల్ల ఇప్పటికే ఉన్న H-1B వీసాల చెల్లుబాటుపై, వీసాదారులు, వారిపై ఆధారపడిన కుటుంబ సభ్యుల హోదాపై ప్రభావం ఉండదని స్పష్టం చేశారు. అయితే, అమెరికాలో శాశ్వత నివాసం పొందేందుకు గ్రీన్ కార్డు ప్రక్రియలో ఉన్న అర్హులైన ఉద్యోగులకు ఇబ్బందులు ఎదురయ్యే అవకాశం ఉందన్నారు.
కాగ్నిజెంట్, ఇన్ఫోసిస్, టీసీఎస్, విప్రో, హెచ్‌సీఎల్, క్యాప్‌జెమినీతో పాటు మైక్రోసాఫ్ట్, అడోబ్ వంటి సంస్థలపై అమెరికా కార్మిక శాఖ చర్యలు తీసుకుంది. ఈ కంపెనీలపై కొనసాగుతున్న దర్యాప్తుల క్రమంలో PERM దరఖాస్తులను నిలిపివేసినట్లు ప్రకటించింది.
►ALSO READ | జేడీ వాన్స్ వ్యాఖ్యలపై భారత్ ఫైర్.. హెచ్1-బీ వీసాదారులపై కామెంట్స్‌కు స్ట్రాంగ్ కౌంటర్
H-1B వీసా కార్యక్రమం దుర్వినియోగానికి గురవుతోందని, అమెరికన్ ఉద్యోగులకు ప్రాధాన్యత ఇవ్వాలని జేడీ వాన్స్ వ్యాఖ్యానించారు. దీనిపై స్పందించిన భారత్.. భారతీయ టెక్ నిపుణులు పరిశోధన, ఆవిష్కరణలు, ఉత్పాదకత పెంపులో కీలక సహకారం అందిస్తున్నారని తెలిపింది. నైపుణ్యం కలిగిన ఉద్యోగుల రాకపోకలు భారత్, అమెరికా రెండు దేశాలకూ ప్రయోజనకరమని స్పష్టం చేసింది. అమెరికా తాజా చర్యలు ఇరు దేశాల ఉమ్మడి లక్ష్యాలకు అనుకూలంగా లేవని, ఈ పరిణామాలను భారత్ నిశితంగా గమనిస్తుందని విదేశాంగ శాఖ వెల్లడించింది.
