గ్రేటర్వ్యాప్తంగా శుక్రవారం దశాబ్ది ఉత్సవాలు ఘనంగా జరిగాయి. రాష్ట్రావతరణ దినోత్సవం సందర్భంగా బల్దియా హెడ్డాఫీసులో మేయర్ గద్వాల్ విజయలక్ష్మి జెండా ఎగురవేశారు. కార్యక్రమంలో బల్దియా కమిషనర్ లోకేశ్కుమార్, అధికారులు పాల్గొన్నారు. వాటర్బోర్డు హెడ్డాఫీసులో ఎండీ దానకిశోర్, హైదరాబాద్ జిల్లా కలెక్టరేట్లో అడిషనల్ కలెక్టర్ వెంకటేశ్వర్లు, హెచ్ఎండీఏ ఆఫీసులో సెక్రటరీ చంద్రయ్య, కమాండ్ కంట్రోల్ సెంటర్లో జాయింట్ సీపీ, అడ్మిన్ పరిమళ, సైబరాబాద్ కమిషనరేట్లో డీసీపీ రితిరాజ్, డీజీపీ ఆఫీసులో పర్సనల్ వింగ్ ఐజీ కమలాసన్ రెడ్డి, గండిపేటలోని రాష్ట్ర పోలీస్ అకాడమీలో డైరెక్టర్ సందీప్ శాండిల్య జెండా ఎగురవేశారు.
కొంగరకలాన్లోని రంగారెడ్డి జిల్లా ఇంటిగ్రేటెడ్ కలెక్టరేట్ ఆవరణలో దశాబ్ది ఉత్సవాలను నిర్వహించారు. మంత్రి సబితా రెడ్డి చీఫ్గెస్టుగా అమరవీరులకు నివాళులు అర్పించారు. ఆమన్గల్, కడ్తాల్, శివరాంపల్లి, తలకొండపల్లి ప్రభుత్వ స్కూళ్ల నుంచి వచ్చిన స్టూడెంట్లు, స్టేట్ హోం చిన్నారుల సాంస్కృతిక ప్రదర్శనలు ఆకట్టుకున్నాయి. కార్యక్రమంలో కలెక్టర్ హరీశ్ పాల్గొన్నారు. శామీర్ పేటలోని మేడ్చల్ జిల్లా కలెక్టరేట్లో జరిగిన ఉత్సవాల్లో మంత్రి మల్లారెడ్డి, కలెక్టర్ అమోయ్కుమార్ పాల్గొన్నారు. కూకట్పల్లి మున్సిపల్ ఆఫీసు ఆవరణలో ఎమ్మెల్యే మాధవరం కృష్ణారావు జెండా ఎగురవేశారు. గాంధీ హాస్పిటల్లో, బౌద్ధనగర్, బన్సీలాల్ పేట డివిజన్లో దశాబ్ది ఉత్సవాలను నిర్వహించారు. ట్యాంక్బండ్పై ఉన్న కొండా లక్ష్మణ్ బాపూజీ విగ్రహం వద్ద ఎమ్మెల్సీ ఎల్. రమణ నివాళులర్పించారు.
రాజేంద్రనగర్లోని అగ్రికల్చర్ వర్సిటీలోని ప్రొఫెసర్ జయశంకర్ విగ్రహానికి ఇన్చార్జి వీసీ వెంకటరమణ పూలమాల వేసి నివాళులర్పించారు. సోమాజిగూడ ప్రెస్క్లబ్లో అలయ్ బలయ్ ఫౌండేషన్ చైర్మన్ బండారు విజయలక్ష్మి ఆధ్వర్యంలో రాష్ట్రావతరణ సంబురాలు నిర్వహించారు. ఉద్యమకారులను సన్మానించారు. కార్యక్రమంలో హర్యానా గవర్నర్ బండారు దత్తాత్రేయ, మాజీ గవర్నర్ విద్యాసాగర్ రావు, బీజేపీ సీనియర్ నేత చింతల రామచంద్రారెడ్డి, మాజీ ఎంపీ బూర నర్సయ్య గౌడ్, ప్రజాగాయకుడు గద్దర్ పాల్గొన్నారు.
– వెలుగు, హైదరాబాద్/రంగారెడ్డి/జీడిమెట్ల/మూసాపేట/పద్మారావునగర్/ముషీరాబాద్/గండిపేట/సీతాఫల్మండి
