ఆగస్టు నెలాఖరు లేదా .. సెప్టెంబర్ మొదటి వారంలో అసెంబ్లీ

• ఈ నెలాఖరు లేదా వచ్చేనెల మొదటి వారంలో సమావేశాలు
• కాళేశ్వరం కమిషన్ నివేదిక, బీసీ రిజర్వేషన్లు, ఇతర కీలక అంశాలపై చర్చించే చాన్స్​
• గిగ్​ వర్కర్లకు ప్రత్యేక చట్టం కోసం బిల్లు ప్రవేశపెట్టే అవకాశం

హైదరాబాద్​, వెలుగు:  ఈ నెల చివరి వారంలో లేదా సెప్టెంబర్​ మొదటివారంలో అసెంబ్లీ సమావేశాలు నిర్వహించేందుకు రాష్ట్ర ప్రభుత్వం సిద్ధమవుతున్నది. త్వరలో రాష్ట్ర కేబినెట్​ భేటీ ఏర్పాటు చేసి దీనిపై నిర్ణయం తీసుకోనున్నది. కాళేశ్వరం ప్రాజెక్టుపై జస్టిస్​ పీసీ ఘోష్​ కమిషన్ ​ఇచ్చిన నివేదికపై అసెంబ్లీ సమావేశాల్లో ప్రధానంగా చర్చించనున్నారు. 

ఇప్పటికే కమిషన్​ తన రిపోర్ట్​లో కాళేశ్వరం ప్రాజెక్టులో జరిగిన అవకతవకలు, లోపాలను ప్రస్తావించింది. ఈ నివేదికపై అసెంబ్లీలో వాడివేడిగా చర్చ జరిగే అవకాశం ఉంది. రిపోర్ట్​పై పూర్తిస్థాయిలో సభ్యులందరి అభిప్రాయాలు తెలుసుకున్నాకే.. చర్యలు తీసుకుంటామని ఇప్పటికే రాష్ట్ర సర్కార్​ స్పష్టం చేసింది. ఇక స్థానిక ఎన్నికలకు సంబంధించి చట్టబద్ధంగా బీసీలకు 42 శాతం రిజర్వేషన్లు కల్పించే బీసీ బిల్లు, పంచాయతీరాజ్​ ఆర్డినెన్స్  రాష్ట్రపతి దగ్గరే పెండింగ్​లో ఉండిపోవడంతో.. కాంగ్రెస్​ పార్టీ పరంగా బీసీలకు 42శాతం రిజర్వేషన్లు కల్పించే దానిపై అసెంబ్లీలో ప్రకటన చేసే అవకాశం ఉంది. అదేవిధంగా ఈ అంశంపై అన్ని రాజకీయ పార్టీలు ముందుకు రావాలని కోరుతూ తీర్మానం చేసే చాన్స్​ ఉంది. ఆ తదుపరి స్థానిక ఎన్నికలకు వెళ్లనున్నట్లు తెలుస్తున్నది. రాష్ట్రంలో గిగ్ వర్కర్ల సంక్షేమం కోసం వారి హక్కులను, భద్రతను కాపాడటానికి ప్రత్యేక చట్టాన్ని తీసుకురావాలని ప్రభుత్వం యోచిస్తున్నది. దీనికి సంబంధించిన బిల్లును ఈ అసెంబ్లీ సమావేశాల్లో ప్రవేశపెట్టే అవకాశాలున్నాయి. రాష్ట్రంలో ఆర్థిక పరిస్థితి, వివిధ అభివృద్ధి కార్యక్రమాలు, రైతులకు సంబంధించిన అంశాలు, విద్య, వైద్య రంగాలపై కూడా అసెంబ్లీలో చర్చించనున్నట్లు తెలుస్తున్నది.