- ఇప్పటికే ప్రారంభమైన 9, 10, ఆపైన క్లా సులు
- బడిబాట పట్టనున్న మరో 17.10 లక్షల మంది స్టూడెంట్లు
- ఎడ్యుకేషన్ అధికారులతో మంత్రి సబిత సమీక్ష
- పేరెంట్స్కు ఇష్టముంటెనే పంపించొచ్చని వెల్లడి
- స్కూలుకు రావాలంటూ ఒత్తిడి చేయొద్దని ఆదేశం
హైదరాబాద్, వెలుగు: రాష్ట్రంలో బుధవారం నుంచి హైస్కూళ్లు పూర్తి స్థాయిలో మొదలుకానున్నాయి. ఇన్నాళ్లూ ఇళ్లకే పరిమితమైన స్టూడెంట్లను బడి బాట పట్టించేందుకు సర్కార్ నిర్ణయం తీసుకుంది. 6, 7, 8 తరగతులకూ ఫిజికల్ క్లాసులను ప్రారంభించాలని నిర్ణయించింది. అన్ని స్కూళ్లలో ఆయా తరగతులకు క్లాసులు ప్రారంభించడం కోసం మార్చి 1 వరకు అవకాశం ఇచ్చింది. హైస్కూల్ క్లాసుల ప్రారంభంపై మంగళవారం స్పెషల్ చీఫ్ సెక్రటరీ చిత్రా రామచంద్రన్, స్కూల్ ఎడ్యుకేషన్ డైరెక్టర్ శ్రీదేవసేనతో మంత్రి సబితా ఇంద్రారెడ్డి సమీక్ష నిర్వహించారు. ఈ నిర్ణయంతో మరో 17.10 లక్షల మంది స్టూడెంట్లు బడిబాట పట్టనున్నారు. అయితే, సర్కారు ఇంత సడన్గా నిర్ణయం తీసుకోవడంపై పేరెంట్స్లో అయోమయం నెలకొంది.
సేఫ్టీ చర్యలు తీసుకోవాలె: సీఎస్
క్లాసులు ప్రారంభం అవుతున్న నేపథ్యంలో టీచర్లు, స్టూడెంట్ల సేఫ్టీ కోసం చర్యలు తీసుకోవాల్సిందిగా అన్ని జిల్లాల కలెక్టర్లను సీఎస్ సోమేశ్ కుమార్ ఆదేశించారు. మంగళవారం ఆయన జిల్లా కలెక్టర్లు, డీఈవోలు, సంక్షేమ శాఖల అధికారులతో టెలీకాన్ఫరెన్స్ నిర్వహించారు. కలెక్టర్ల నేతృత్వంలోని జిల్లా స్థాయి ఎడ్యుకేషన్ మానిటరింగ్ కమిటీలు సమావేశం కావాలని, క్లాసులు సాఫీగా సాగేలా చర్యలు తీసుకోవాలని
సూచించారు.
విద్యావలంటీర్లను నియమించాలి: టీచర్లు
సర్కారు నిర్ణయాన్ని టీచర్ల సంఘాలు స్వాగతించాయి. ఖాళీగా ఉన్న టీచర్ పోస్టుల స్థానంలో విద్యావలంటీర్లను నియమించాలని టీఎస్యూటీఎఫ్, టీపీటీఎఫ్, టీఎస్జీహెచ్ఎంఏ, ఎస్టీటీయూ, బీహెచ్ఎస్ఎస్, ఆర్యూపీపీటీ, ఎస్జీటీ ఫోరమ్ తదితర సంఘాల నేతలు కోరారు. బడుల్లో స్వచ్ఛ కార్మికులను నియమించాలని విజ్ఞప్తి చేశారు. నిజానికి కరోనా ఎఫెక్ట్తో 2020–21 విద్యా సంవత్సరం చాలా లేట్గా మొదలైంది. సెప్టెంబర్ ఫస్ట్ నుంచే మూడో తరగతి నుంచి పదో తరగతి వరకూ ఆన్లైన్ క్లాసులకు సర్కారు అనుమతిచ్చింది. కరోనా కేసులు తగ్గుముఖం పడుతుండటంతో ఈ నెల ఫస్ట్ నుంచి 9, 10 క్లాసులతో పాటు ఆపై తరగతులకూ ఫిజికల్ క్లాసులు మొదలయ్యాయి. ప్రస్తుతం 8,891 సర్కారీ బడుల్లో 8 లక్షల 88 వేల 742 మంది, 10,275 ప్రైవేట్ స్కూళ్లలో 8 లక్షల 28 వేల 516 మంది, వివిధ సంక్షేమ శాఖలు నిర్వహిస్తున్న1,157 గురుకులాల్లో లక్షా 98 వేల 853 మంది స్టూడెంట్స్ 6, 7, 8 క్లాసులు చదువుతున్నారు.
పేరెంట్స్కు ఇష్టమైతేనే: మంత్రి సబితారెడ్డి
తల్లిదండ్రుల నుంచి వస్తున్న రిక్వెస్ట్ల మేరకే బుధవారం నుంచి 6, 7, 8 స్టూడెంట్లకు ఫిజికల్ క్లాసులను ప్రారంభించేందుకు నిర్ణయించామని మంత్రి సబితా ఇంద్రా రెడ్డి తెలిపారు. పేరెంట్స్కు ఇష్టమైతేనే స్టూడెంట్స్ను క్లాసులకు అనుమతిస్తామన్నారు. స్కూలుకు రావాలంటూ స్టూడెంట్లను ఒత్తిడి చేయొద్దని మేనేజ్మెంట్లను ఆదేశించారు. ప్రస్తుతం టెన్త్లో 85 శాతం, ఇంటర్లో 72 శాతం మంది స్టూడెంట్లు ఫిజికల్ క్లాసులకు హాజరవుతున్నారని చెప్పారు. స్థానిక ఏర్పాట్లను బట్టి మార్చి 1 వరకు స్కూళ్లను ప్రారంభించుకోవచ్చన్నారు. ప్రభుత్వ, ప్రైవేట్ స్కూళ్లలో ప్రత్యేకంగా శానిటైజేషన్ ప్రక్రియను చేపట్టనున్నట్టు ఆమె చెప్పారు. స్టూడెంట్స్ తప్పనిసరిగా మాస్క్ ధరించాలని, ఫిజికల్ డిస్టెన్స్ పాటించాలని సూచించారు. క్లాసులకు హాజరు కాని స్టూడెంట్ల కోసం ఆన్లైన్ క్లాసులు కొనసాగుతాయని చెప్పారు. రూములు తక్కువగా ఉంటే షిఫ్ట్ పద్ధతిలో బడులు నడుపుకోవచ్చని చెప్పారు. కాగా, సర్కారు బడుల్లోని స్టూడెంట్స్కు మధ్యాహ్న భోజనం పెట్టాల్సిందిగా హెడ్మాస్టర్లను స్కూల్ ఎడ్యుకేషన్ డైరెక్టర్ శ్రీదేవసేన ఆదేశించారు.
ఇవి కూడా చదవండి
ఈశ్వరీబాయి జీవిత ప్రస్థానం యువతకు స్ఫూర్తి
కార్డియాక్ అరెస్టా.. ? ఇట్ల బయటపడొచ్చు
అమెజాన్ లక్కీ లాటరీ పేరుతో టీచర్ ను ట్రాప్ చేసి..
కారు యాక్సిడెంట్.. పోలీసులకు బంగారం అప్పగించిన 108 సిబ్బంది
