హెల్మెట్ పెట్టుకుని..గొడ్డలి పట్టుకుని తిరుగుతూ యువకుడి హల్ చల్
తాళ్లతో కట్టి బంధించిన గ్రామస్థులు
పబ్జీ వ్యసనం ఎన్ని అనర్థాలకు దారి తీస్తోందో చెప్పే ఘటన మరొకటి జరిగింది. పబ్జీకి బానిసైన ఓ యువకుడు మూడు రోజులుగా హెల్మెట్ పెట్టుకుని, గొడ్డలి పట్టుకుని ఊరంతా హల్చల్ చేశాడు. అతడి విపరీత చేష్టలకు విసిగిపోయిన ఊరోళ్లు అతడిని తాళ్లతో కట్టి పడేశారు. ఈ ఘటన జగిత్యాల జిల్లా నర్సింగాపూర్ గ్రామంలో జరిగింది. ఊరికి చెందిన అనిల్ అనే యువకుడు ఫొటోగ్రాఫర్గా పనిచేస్తున్నాడు. ఖాళీ సమయాల్లో పబ్జీ ఆడుతుండేవాడు. అదే వ్యసనంలా మారింది. దీంతో నిజ జీవితంలోనూ గేమ్ ఆడుతున్నానన్న భావనతో మూడు రోజులుగా వింతగా ప్రవర్తిస్తున్నాడు. హెల్మెట్ పెట్టుకుని షూట్ చేసి చంపేస్తానంటూ ఇంట్లో కేకలు పెట్టాడు. గురువారం బయట ఆడుకుంటున్న పిల్లలను గదిలో పెట్టి తాళం వేశాడు. చిన్నారుల కేకలతో స్థానికులు తాళం తీసి వాళ్లను బయటకు పంపించారు. అనిల్కు నచ్చజెప్పారు. పబ్జీ ఆడుతున్నానన్న మోజులోనే ఇంట్లోని టీవీ, కెమెరా, కంప్యూటర్లను పగలగొట్టాడు. శుక్రవారం గొడ్డలి పట్టుకుని జనాన్ని భయపెట్టాడు. ఇంట్లోవాళ్లను బయటకు గెంటేసి తలుపులు పెట్టుకుని పబ్జీ గేమ్ పేరుతో వస్తువులను చిందర వందరగా పడేశాడు. దీంతో అతడిని తాడుతో కట్టేశారు. కొద్ది రోజులుగా అతడు మత్తు పదార్థాలకు బానిస అయ్యాడని, అందుకే పబ్జీ గేమ్ నుంచి బయటకు రాలేక ఇలా వింతగా ప్రవర్తిస్తున్నాడని గ్రామస్థులు చెబుతున్నారు. పోలీసులకు గ్రామస్థులు ఫిర్యాదు చేశారు. కోర్టు, వైద్యుల అనుమతి తీసుకుని అతడికి ట్రీట్మెంట్ చేయిస్తామని పోలీసులు వెల్లడించారు.
