- పరారీలో మరో 8 మంది
జూబ్లీహిల్స్, వెలుగు: విదేశాల్లో ఉద్యోగాలు ఇప్పిస్తామంటూ నిరుద్యోగులను నమ్మించి కోట్లాది రూపాయలు వసూలు చేసిన ‘ట్రివియల్ చాప్టర్’ సంస్థ మోసాన్ని జూబ్లీహిల్స్ పోలీసులు బట్టబయలు చేశారు. ఇన్స్టాగ్రామ్, ఫేస్బుక్ ద్వారా యూరప్ దేశాలైన గ్రీస్, రొమేనియా, ఇటలీ వంటి దేశాల్లో ఉద్యోగాలంటూ ప్రచారం చేస్తూ, ఒక్కో బాధితుడి నుంచి రూ. 50 వేల నుంచి రూ. 4 లక్షల వరకు వసూలు చేశారు. అనంతరం నకిలీ ఆఫర్ లెటర్లు ఇచ్చి ఈ ముఠా చేతులెత్తేసింది.
బాధితుల ఫిర్యాదుతో రంగంలోకి దిగిన పోలీసులు.. సంస్థ వైస్ ప్రెసిడెంట్ లంక నిరుపమ, రీజినల్ మేనేజర్ మామిడి అరుణ్ రాజ్ను మంగళవారం అరెస్ట్ చేశారు. ఈ కేసులో పరారీలో ఉన్న మరో 8 మంది నిందితుల కోసం గాలిస్తున్నారు. గతంలో కూడా ఈ గ్యాంగ్ కేపీహెచ్బీ పోలీస్ స్టేషన్ పరిధిలో ఇలాంటి మోసాలకు పాల్పడినట్లు రికార్డులు ఉన్నట్లు పోలీసులు తెలిపారు. విదేశీ ఉద్యోగాల కోసం ప్రయత్నించేవారు eMigrate పోర్టల్ లో నమోదు చేసుకున్న లైసెన్సుడు ఏజెంట్లను మాత్రమే సంప్రదించాలని సూచించారు.
