కృష్ణాలో మునిగిపోయిన ఇద్దరు యువకులు
మక్తల్/మాగనూరు, వెలుగు: నీటిలో మునిగిపోతున్న అమ్మాయిని వారిద్దరు కాపాడారు. అయితే లోతు ఎక్కువగా ఉండడంతో వారిద్దరు నదిలో మునిగి చనిపోయారు. ఈ సంఘటన నారాయణపేట జిల్లా కృష్ణా మండలంలో ఆదివారం జరిగింది. పశ్చిమగోదావరి జిల్లా పాలకొల్లుకు చెందినవారు కుటుంబ సభ్యులతో కలిసి హైదరాబాద్ లో బంధువుల వివాహానికి రెండు రోజుల క్రితం హాజరయ్యారు. అక్కడి నుంచి మక్తల్ నియోజకవర్గం కృష్ణా మండలం వాసునగర్ లో ఉన్న బంధువు దుర్గరాజు దగ్గరకు వచ్చారు. ఆదివారం ఉదయం 11 గంటల సమయంలో ఇద్దరు అబ్బాయిలు, నలుగురు అమ్మాయిలు సరదాగా నదిలో స్నానం చేయడానికి వెళ్లారు. నదిలో స్నానం చేస్తుండగా ఓ అమ్మాయి కాలు జారి నీటిలో మునిగిపోతుండడంతో ఆమెను రక్షించేందుకు రామకృష్ణ రాజు(27), శ్రీహరి రాజు(24) నదిలోకి దిగారు. ఆమెను నది ఒడ్డుకు లాగారు. అయితే అక్కడ లోతు ఎక్కువ ఉండడంతో వీరిద్దరు మునిగిపోయారు. మక్తల్ సీఐ శంకర్ గజ ఈతగాళ్లతో మృతదేహాలను బయటకు తీయించారు. రామకృష్ణరాజు పాలకొల్లులో హోటల్ నిర్వహిస్తూ కుటుంబాన్ని పోషిస్తున్నారు. శ్రీహరి రాజు హైదరాబాద్‌లో డిగ్రీ చదువుతున్నాడు.
