న్యూఢిల్లీ: దేశంలో ఆహార ధాన్యాలు నిల్వ చేసేందుకు కొత్త గోదాములు నిర్మించాలని కేంద్ర ప్రభుత్వం నిర్ణయించింది. ఇందుకోసం రానున్న ఐదేండ్లలో రూ.లక్ష కోట్లు ఖర్చు చేసేందుకు కేంద్ర కేబినెట్ ఆమోదం తెలిపింది. బుధవారం ప్రధాని నరేంద్ర మోడీ నేతృత్వంలో కేబినెట్ మీటింగ్ జరిగింది. ఈ మీటింగ్ వివరాలను కేంద్రమంత్రి అనురాగ్ ఠాకూర్ మీడియాకు వెల్లడించారు. కోఆపరేటివ్ సెక్టార్లో పెద్ద ఎత్తున గోదాములు నిర్మించాలని నిర్ణయించామని ఆయన తెలిపారు. ‘‘మన దేశంలో ఏటా 31 కోట్ల టన్నుల ఆహార ధాన్యాలు పండుతున్నాయి. కానీ ప్రస్తుతం అందుబాటులో ఉన్న గోదాములలో 14.50 కోట్ల టన్నుల ధాన్యాలను మాత్రమే నిల్వ చేయొచ్చు. ఈ నేపథ్యంలో కొత్తగా 7 కోట్ల టన్నుల సామర్థ్యం గల గోదాములు నిర్మించాలని నిర్ణయించాం” అని వివరించారు. ఒక్కో జిల్లాలో 2 వేల టన్నుల సామర్థ్యం గల గోదాములు నిర్మిస్తామని కేంద్ర మంత్రి అనురాగ్ ఠాకూర్ చెప్పారు.
10 జిల్లాల్లో పైలట్ ప్రాజెక్టు..
మన దేశంలో వ్యవసాయ సహకార సంఘాలు (ప్యాక్స్) లక్ష ఉన్నాయని, వీటిలో 63 వేలు పని చేస్తున్నాయని అనురాగ్ ఠాకూర్ తెలిపారు. మొదట పైలట్ ప్రాజెక్టు కింద ప్యాక్స్ల పరిధిలో 10 జిల్లాల్లో గోడౌన్లు ఏర్పాటు చేస్తామన్నారు. ఇందుకోసం ఇంటర్ మినిస్టీరియల్ కమిటీని ఏర్పాటు చేస్తామన్నారు. దీనికోసం అగ్రికల్చర్, ఫుడ్ ప్రాసెసింగ్ ఇండస్ట్రీస్, కన్జ్యూమర్ అఫైర్స్ మంత్రిత్వ శాఖల నిధులను వినియోగిస్తామని పేర్కొన్నారు. కేవలం గోదాముల నిర్మాణమే కాకుండా, ప్యాక్స్ ల బలోపేతానికి వివిధ కార్యక్రమాలు చేపడతామని వెల్లడించారు.
