- తమిళనాడులో ఘోర ప్రమాదం
- మృతుల్లో ఏడుగురు మహిళలే..
వాల్పారై (తమిళనాడు): తమిళనాడులోని కోయంబత్తూర్ జిల్లా వాల్పారై ఘాట్ రోడ్డులో శుక్రవారం ఘోర ప్రమాదం జరిగింది. కేరళకు చెందిన పర్యాటకులు ప్రయాణిస్తున్న వ్యాన్ అదుపు తప్పి లోయలో పడి 9 మంది దుర్మరణం చెందారు. డ్రైవర్ సహా మరో నలుగురు తీవ్రంగా గాయపడ్డారు. కేరళలోని మలప్పురం జిల్లాకు చెందిన 13 మంది పర్యాటకులు వాల్పారై విహారయాత్రకు వచ్చి తిరిగి వెళ్తుండగా ఈ ప్రమాదం జరిగింది.
వాల్పారై -పొల్లాచ్చి కొండ మార్గంలోని 13వ హెయిర్పిన్ బెండ్ వద్ద డ్రైవర్ నియంత్రణ కోల్పోవడంతో వ్యాన్ రక్షణ గోడను ఢీకొట్టి అగాధంలోకి దూసుకెళ్లింది. వ్యాన్ లోయలో పడడంతో నుజ్జునుజ్జు అయ్యింది. 8 మంది ఘటనా స్థలంలోనే ప్రాణాలు కోల్పోగా ఒకరు హాస్పిటల్లో చికిత్స పొందుతూ మరణించారు. మృతుల్లో ఏడుగురు మహిళలు. ఇద్దరు పురుషులు ఉన్నారు. వీరంతా మలప్పురంలోని ఓ స్కూల్కు చెందిన టీచర్లుగా పోలీసులు అనుమానిస్తున్నారు.
సమాచారం తెలిసిన వెంటనే పోలీసులు, ఫైర్ సిబ్బంది ఘటనా స్థలానికి చేరుకుని సహాయక చర్యలు చేపట్టారు. లోయలో నుంచి డెడ్బాడీలను వెలికి తీసి గాయపడిన వారిని పొల్లాచ్చి గవర్నమెంట్హాస్పిటల్కు తరలించారు. ప్రమాదానికి గల కారణాలపై కోయంబత్తూర్ పోలీసులు కేసు నమోదు చేసి దర్యాప్తు చేస్తున్నారు. ఈ విషాద ఘటనపై పీఎం మోదీ దిగ్భ్రాంతి వ్యక్తం చేశారు. " కోయంబత్తూరులో జరిగిన ప్రమాద వార్త నన్ను ఎంతగానో కలచివేసింది. మృతుల కుటుంబాలకు ప్రగాఢ సానుభూతి తెలియజేస్తున్నాను. గాయపడిన వారు త్వరగా కోలుకోవాలని ప్రార్థిస్తున్నాను" అని పేర్కొన్నారు.
