హుజూరాబాద్, వెలుగు: నియోజకవర్గ ప్రజలకు ఎల్లవేళలా అందుబాటులో ఉంటూ మీ కష్టసుఖాలలో పాలుపంచుకుంటానని కాంగ్రెస్ హుజూరాబాద్ఎమ్మెల్యే అభ్యర్థి ప్రణవ్ బాబు అన్నారు. శుక్రవారం హుజూరాబాద్ మండలం బోర్నపల్లిలో ఎన్నికల ప్రచారం నిర్వహించారు. ఈ సందర్భంగా ఆయన మాట్లాడుతూ తాను మీలో ఒక్కడినని, మీ ఇంట్లో కొడుకులాగా ఆదరించాలని కోరారు. బీఆర్ఎస్ ప్రభుత్వం 10 ఏండ్లు పాలించినా ప్రజలుకు చేసిందేమీ లేదన్నారు.
అధికారంలో ఉన్నప్పుడు గుర్తుకురాని ప్రజల కష్టాలు.. ఎలక్షన్లు రాగానే గుర్తుకువచ్చాయా అని బీఆర్ఎస్ లీడర్లను ప్రశ్నించారు. తాను గెలిస్తే నియోజకవర్గంలోని ప్రతి మండలంలో డిజిటల్ లైబ్రరీలు, స్టడీ సెంటర్లు ఏర్పాటు చేస్తానని హామీ ఇచ్చారు. ఏడుసార్లు గెలిచిన ఈటల రాజేందర్ నియోజకవర్గానికి చేసిందేమీ లేదన్నారు.
గురువారం రేవంత్‌రెడ్డి సభకు వచ్చిన ఓ మహిళ గ్రామానికి వెళ్తూ ట్రాక్టర్ మీద నుంచి పడి తీవ్రగాయాలతో చికిత్స పొందుతూ చనిపోవడం బాధకరమని, ఆమె కుటుంబాన్ని ఆదుకుంటామన్నారు. అనంతరం బీఆర్ఎస్, బీజేపీకి చెందిన పలువురు లీడర్లు ప్రణవ్ సమక్షంలో కాంగ్రెస్‌లో చేరారు. టౌన్ అధ్యక్షుడు సొల్లు బాబు, మహిళా కాంగ్రెస్ అధ్యక్షురాలు పుష్పలత, నాయకులు, కార్యకర్తలు పాల్గొన్నారు.
