రాంచీ: టెస్టు సిరీస్‌‌‌‌లో దారుణ ఓటమి చవి చూసిన టీమిండియా ఇప్పుడు సౌతాఫ్రికాతో వన్డే సిరీస్‌‌‌‌కు సిద్ధమైంది. మూడు వన్డేల సిరీస్‌‌‌‌లో భాగంగా ఆదివారం రాంచీలో జరిగే తొలి మ్యాచ్లో గెలుపే లక్ష్యంగా బరిలోకి దిగుతోంది. వైట్‌‌‌‌బాల్ క్రికెట్‌‌‌‌లో వరుసగా చాంపియన్స్ ట్రోఫీ, ఆసియా కప్ గెలిచిన ఇండియా.. ఈ సిరీస్ నెగ్గి టెస్ట్ పరాభవానికి ప్రతీకారం తీర్చుకోవాలని చూస్తోంది. అయితే, కెప్టెన్ శుభ్‌‌‌‌మన్ గిల్, వైస్ కెప్టెన్ శ్రేయస్ అయ్యర్ గాయాల కారణంగా దూరమవడంతో ఇండియా వరుసగా మూడో ఇంటర్నేషనల్‌ మ్యాచ్లో మూడో కెప్టెన్ (కేఎల్ రాహుల్) నాయకత్వంలో ఆడుతోంది. కీలక బౌలర్లు జస్‌‌‌‌ప్రీత్ బుమ్రా, సిరాజ్‌‌‌‌కు రెస్ట్‌ ఇవ్వగా కేఎల్ రాహుల్ జట్టునుఎలా నడిపిస్తాడన్నది ఆసక్తికరం.
రోకోపై ఫోకస్‌.. కాంబినేషన్‌‌పై టెన్షన్‌
ఈ సిరీస్‌‌‌‌లో అందరి దృష్టి సీనియర్ ఆటగాళ్లు రోహిత్ శర్మ, విరాట్ కోహ్లీపైనే ఉంది. ఈ ఇద్దరూ ఇప్పుడు వన్డే ఫార్మాట్‌‌‌‌లో మాత్రమే ఆడుతున్నారు. 2027 వరల్డ్ కప్ సమయానికి వాళ్ల ఫిట్‌‌‌‌నెస్ ఎలా ఉంటుందో తెలుసుకునేందుకు సెలెక్టర్లకు రాబోయే ఆరు వన్డేలు (సౌతాఫ్రికాతో 3, న్యూజిలాండ్‌‌‌‌తో 3) ఒక పెద్ద పరీక్షగా మారనున్నాయి. ఇక, 2013లో రాంచీ స్టేడియంలోనే రోహిత్ తొలిసారి పూర్తి స్థాయి ఓపెనర్గా బరిలోకి దిగాడు. ఆ మార్పు హిట్‌‌‌‌మ్యాన్ వైట్ బాల్‌ ఫార్మాట్ కెరీర్‌‌‌‌‌‌‌‌నే కాకుండా వన్డేల్లో ఇండియా పంథానే మార్చేసింది. ఆస్ట్రేలియాతో చివరి వన్డేలో సెంచరీ చేసిన 37 ఏండ్ల రోహిత్.. అదే జోరునూ రాంచీలోనూ చూపెట్టాలని ఫ్యాన్స్ ఆశిస్తున్నారు. అయితే, రెగ్యులర్ ఆటగాళ్లు లేకపోవడంతో, తుది జట్టు ఎంపిక కోచ్ గౌతమ్ గంభీర్, స్టాండిన్‌ కెప్టెన్ కేఎల్ రాహుల్‌‌‌‌కు తలనొప్పిగా మారింది. టెస్ట్ సిరీస్ ఓడిపోవడం వల్ల గంభీర్ ఎంపికలపై విమర్శలు వచ్చాయి. ఈ సిరీస్‌‌‌‌లో ఫలితం తేడా వస్తే అతని పనితీరుపై మరిన్ని ప్రశ్నలు వస్తాయి కాబట్టి సరైన కాంబినేషన్‌‌‌‌తో ముందుకెళ్లడం కీలకం కానుంది. ఓపెనర్గా గిల్ స్థానంలో యశస్వి జైస్వాల్.. హిట్‌‌‌‌మ్యాన్‌‌‌‌తో కలిసి ఇన్నింగ్స్‌ ఆరంభించనున్నాడు. వన్‌‌‌‌డౌన్‌‌‌‌లో కింగ్ కోహ్లీ బరిలోకి దిగనుండగా రుతురాజ్ గైక్వాడ్‌‌‌‌తో పోటీ ఉన్నప్పటికీ నిలకడగా ఆడుతున్న తిలక్ వర్మకు చోటు దక్కొచ్చు. ఇక మిడిలార్డర్‌‌‌‌‌‌‌‌లో స్పిన్ ఆల్‌‌‌‌రౌండర్‌‌‌‌గా వాషింగ్టన్ సుందర్ ఉంటాడా లేక పేస్ ఆల్‌‌‌‌రౌండర్‌‌‌‌గా నితీష్ రెడ్డికి అవకాశం ఇస్తారా? అనేది మేనేజ్‌‌‌‌మెంట్‌ తేల్చాలి. కెప్టెన్ రాహుల్ కీపింగ్ కూడా చేస్తే రిషబ్ పంత్‌‌‌‌కు తుది జట్టులో చోటు కష్టమే. స్పెషలిస్ట్ స్పిన్నర్‌‌‌‌‌‌‌‌గా కుల్దీప్ యాదవ్‌‌‌‌తో పాటు పేస్ బౌలింగ్‌‌‌‌లో ప్రసిద్ధ్ కృష్ణ, అర్ష్‌‌‌‌దీప్ సింగ్, హర్షిత్ రాణా కీలకం కానున్నారు.
ఉత్సాహంతో సౌతాఫ్రికా
టెస్ట్ సిరీస్‌‌‌‌ను క్లీన్ స్వీప్ చేయడంతో సౌతాఫ్రికా ఆటగాళ్లు చాలా ఉత్సాహంగా ఉన్నారు. మెయిన్ బౌలర్లు రబాడ, అన్రిచ్ నార్జ్ లేకపోయినా.. ఇండియాను వైట్‌‌‌‌వాష్ చేయడంతో ఆ జట్టు ఆత్మవిశ్వాసం పెరిగింది. వన్డే సిరీస్‌‌‌‌లో ఇది తమకు ఉపయోగపడుతుందని కెప్టెన్ బవూమ నమ్ముతున్నాడు. టెస్టుల్లో ఇండియాను దెబ్బకొట్టిన మార్కో యాన్సెన్‌‌కు తోడుగా వన్డేల్లో కోయెట్జీ, నాండ్రే బర్గర్, ఎంగిడి పేస్ బాధ్యత తీసుకోవడానికి సిద్ధంగా ఉన్నారు. ఐడెన్ మార్‌‌‌‌‌‌‌‌క్రమ్, బవూమ తిరిగి వన్డే టీమ్‌‌‌‌లోకి రావడంతో సఫారీ బ్యాటింగ్ లైనప్ బలంగా మారింది. వీరికి తోడు డికాక్, బ్రెవిస్ సత్తా చాటేందుకు సిద్ధంగా ఉన్నారు. స్పిన్‌‌‌‌కు కేశవ్ మహరాజ్ నాయకత్వం వహిస్తాడు. సఫారీ కొత్త ప్లేయర్ మాథ్యూ బ్రీట్జ్‌‌‌‌కేపై భారీ అంచనాలున్నాయి. వన్డేల్లో అరంగేట్రం చేసిన తొలి ఐదు ఇన్నింగ్స్‌‌‌‌ల్లో 50 అంతకంటే ఎక్కువ రన్స్ చేసిన క్రికెటర్‌ అతనే కావడం విశేషం. 67.75 సగటుతో ఆడుతున్న మాథ్యూ ఇండియాకు
సవాల్ విసిరే అవకాశం ఉంది.
తుది జట్లు (అంచనా)
ఇండియా: యశస్వి జైస్వాల్, రోహిత్ శర్మ, విరాట్ కోహ్లీ, తిలక్, రుతురాజ్/రిషబ్ పంత్, కేఎల్ రాహుల్ (కెప్టెన్, కీపర్), కుల్దీప్, సుందర్/నితీష్ రెడ్డి, హర్షిత్ రాణా, అర్ష్‌‌‌‌దీప్ సింగ్, ప్రసిద్ధ్ కృష్ణ.
సౌతాఫ్రికా: మార్‌‌‌‌‌‌‌‌క్రమ్, డికాక్ (కీపర్), బవూమ (కెప్టెన్), మాథ్యూ బ్రీట్జ్‌‌‌‌కే, డెవాల్డ్ బ్రెవిస్, రూబిన్ హెర్మాన్, మార్కో యాన్సెన్, కార్బిన్ బాష్, కేశవ్ మహరాజ్, నాండ్రే బర్గర్,
ఎంగిడి.
పిచ్/వాతావరణం
రాంచీ గ్రౌండ్‌‌‌‌లో ఇప్పటివరకు 5 వన్డేలు మాత్రమే జరిగాయి. ఈ పిచ్ సాధారణంగా స్లోగా ఉంటుంది. గతంలో ఇక్కడ 300+ స్కోరు ఒకేసారి నమోదైంది. 270–-280 టార్గెట్ ఛేజ్ చేయడం కూడా ఇక్కడ అంత ఈజీ కాదు. మంచు ప్రభావం లేకపోతే మొదట బ్యాటింగ్ చేయడం మంచిది.
