న్యూఢిల్లీ: ఐఐటీ మద్రాస్ డైరెక్టర్ ప్రొఫెసర్ వి. కామకోటిని ఉద్దేశించి కాంగ్రెస్ ఎంపీ ప్రియాంక గాంధీ చేసిన ‘గోమూత్ర నిపుణుడు’ వ్యాఖ్యలపై దేశవ్యాప్తంగా 215 మంది వైస్ చాన్స్లర్లు, మాజీ వైస్ చాన్స్లర్లు, విద్యావేత్తలు తీవ్ర అభ్యంతరం వ్యక్తం చేశారు. ఈ మేరకు వారు గురువారం ప్రియాంక గాంధీకి బహిరంగ లేఖ రాశారు.
వ్యంగ్యంగా అయినా, రాజకీయ వ్యాఖ్యగా అయినా ఒక ప్రముఖ శాస్త్రవేత్తను ఇలాంటి పదజాలంతో సంబోధించడం సరికాదని లేఖలో పేర్కొన్నారు. ఇలాంటి కామెంట్స్ దేశ విద్యా, శాస్త్ర పరిశోధన రంగాలకు తప్పుడు సంకేతాలు పంపుతాయన్నారు. ఒక శాస్త్రవేత్త అభిప్రాయాలను ఆధారాలతో ఖండించకుండా, ఆయనపై ఒక ముద్ర వేయడం ఏ మాత్రం ఆమోదయోగ్యం కాదన్నారు.
