గచ్చిబౌలి, వెలుగు: బయటి వ్యక్తులకు ప్రవేశం లేకుండా పటిష్ట బందోబస్తు మధ్య ఉండే హైదరాబాద్ సెంట్రల్ యూనివర్సిటీలో దొంగతనం జరగడం సంచలనంగా మారింది. వర్సిటీలోని సీఆర్ రావు ఇన్స్టిట్యూట్ క్లాస్రూమ్లో ఆదివారం రాత్రి గుర్తు తెలియని దొంగలు కిటికీ గ్రిల్స్ తొలగించి లోపలికి చొరబడి 50 ల్యాప్టాప్లు ఎత్తుకెళ్లారు. సోమవారం ఉదయం క్లాస్రూమ్లో ల్యాప్టాప్లు కనిపించకపోవడంతో వర్సిటీ మేనేజ్మెంట్ పోలీసులకు సమాచారం అందించింది.
ఘటనా స్థలానికి చేరుకున్న గచ్చిబౌలి పోలీసులు కిటికీ గ్రిల్స్ తొలగించబడినట్లు, సమీపంలో కారు టైర్ల గుర్తులు ఉన్నట్లు గమనించారు. ఇంత పెద్ద ఎత్తున ల్యాప్టాప్లు ఉన్న విషయం వర్సిటీలోని కొందరికే తెలిసి ఉంటుందని, శుక్రవారమే ఈ ల్యాప్టాప్లు తీసుకొచ్చినట్లు తెలియడంతో ఇది ఇంటర్నల్ దొంగతనమో లేక బయటి వ్యక్తుల సహకారంతో జరిగిందో అనుమానాలు వ్యక్తమవుతున్నాయి. సీసీటీవీ ఫుటేజీ ఆధారంగా పోలీసులు దర్యాప్తు కొనసాగిస్తున్నారు.
