కొత్తగా ల్యాప్టాప్ వాడుతున్నవాళ్లు దాంతోపాటు కొన్ని యాక్సెసరీస్ తప్పకుండా కొనుక్కోవాలి. ల్యాప్టాప్ వాడకాన్ని బట్టి యాక్సెసరీస్ కూడా యాడ్ చేసుకోవాలి. వీటిని వాడితే ల్యాప్టాప్ లైఫ్ పెరగడంతో పాటు పదే పదే పాడుకాకుండా ఉంటుంది. అలాంటి గాడ్జెట్స్ కొన్ని..
ల్యాప్ డెస్క్
ఇంట్లో ఉండి పనిచేసేవాళ్లలో చాలామంది ల్యాప్టాప్ కోసం ప్రత్యేకంగా డెస్క్ని కొనుక్కోవడం లేదు. సోఫాలో కూర్చొని, బెడ్ మీద పడుకుని ల్యాప్టాప్ ఆపరేట్ చేస్తున్నారు. అలాంటప్పుడు మౌస్ వాడడం కాస్త ఇబ్బందిగా ఉంటుంది. అలాంటప్పుడు ఈ మినీ ల్యాప్ టాప్డెస్క్ని కొనడం బెటర్. ఇది తీసుకుంటే సోఫాలో కూర్చుని కూడా ఈజీగా పని చేయొచ్చు. ఔట్డోర్లో పనిచేయడానికి కూడా ఇది బాగా యూజ్ అవుతుంది. దీనికి ఫోన్ స్లాట్తోపాటు మౌస్ప్యాడ్ కూడా ఉంటుంది. దీని కింది భాగంలో ఉన్న గడుల వల్ల ల్యాప్టాప్ కూలింగ్ సిస్టమ్ బాగా పనిచేస్తుంది.
ధర: క్వాలిటీని బట్టి 500 రూపాయల నుంచి మొదలు
కూలింగ్ ప్యాడ్
ల్యాప్టాప్ ఎక్కువగా వాడేవాళ్లు కూలింగ్ ప్యాడ్ కచ్చితంగా వాడాలి. ఎందుకంటే.. పీసీలకు ఉన్నట్టు ల్యాప్టాప్లకు పెద్ద కూలింగ్ ఫ్యాన్లు ఉండవు. కాబట్టి తొందరగా వేడెక్కుతుంది. ఎక్కువగా వాడే ల్యాప్టాప్ల టెంపరేచర్ని తగ్గించాలంటే ఇన్బిల్ట్గా వచ్చే ఫ్యాన్ల కెపాసిటీ సరిపోదు. దాంతో ల్యాప్టాప్లు తొందరగా పాడవుతాయి. అందుకే ఈ ఎక్స్ ట్రా కూలింగ్ ప్యాడ్ని వాడాలి. ఈ ప్యాడ్లు మార్కెట్లో రకరకాల వేరియెంట్లతో వస్తున్నాయి. రెండు, నాలుగు, ఐదు, ఆరు ఫ్యాన్లతో తయారుచేస్తున్నారు. ల్యాప్టాప్ వాడకాన్ని బట్టి వాటిని సెలెక్ట్ చేసుకోవాలి. మరీ ఎక్కువగా వాడేవాళ్లు ఎక్కువ ఫ్యాన్లు ఉండే వాటిని వాడాలి.
ధర: క్వాలిటీని బట్టి 900 రూపాయల నుంచి మొదలు
డాకింగ్ స్టేషన్
కొందరు ల్యాప్టాప్లను వర్క్ స్టేషన్, గేమింగ్ సెటప్ కోసం వాడుతుంటారు. అలాంటప్పుడు వాటికి రకరకాల గాడ్జెట్స్ కనెక్ట్ చేయాల్సి ఉంటుంది. ఇప్పుడు నార్మల్ యూజర్స్ కూడా చాలా గాడ్జెట్స్ కనెక్ట్ చేస్తున్నారు. అలాంటప్పుడు ల్యాప్టాక్కు ఉండే యూ ఎస్బీ పోర్ట్స్ సరిపోవు. సరిపోయినా.. ఎక్కువగా వాడడం వల్ల తొందరగా పాడవుతాయి. కాబట్టి అలాంటివాళ్లు కచ్చితంగా డాకింగ్ స్టేషన్స్ని వాడాలి. మార్కెట్లో చాలా కంపెనీలు రకరకాల డిజైన్లతో వీటిని తీసుకొచ్చాయి. థండర్ బోల్ట్ లాంటి ప్రీమియం డాకింగ్ స్టేషన్లు 14 పోర్టులతో వస్తున్నాయి. డాకింగ్ స్టేషన్ని కొనేటప్పుడు యూఎస్ బీ పోర్ట్ తో పాటు డిస్ ప్లేపోర్ట్లు, ఎస్డీ కార్డ్ రీడర్, ఆడియో ఇన్/అవుట్ పోర్ట్, ఈథర్నెట్, టైప్-–సీ లాంటి అవసరమైన పోర్టులన్నీ ఉండేట్టు చూసుకోవాలి.
ధర: క్వాలిటీ, స్పెసిఫికేషన్స్ ని బట్టి 500 రూపాయల నుంచి మొదలు
పవర్ బ్యాంక్
ల్యాప్టాప్లో బ్యాటరీ ఉన్నా.. కొన్నిసార్లు పవర్ బ్యాంక్ కూడా అవసరమే. ఎందుకంటే.. ఔట్ డోర్లో వర్క్ చేస్తున్నప్పుడు, ట్రావెలింగ్లో ల్యాప్టాప్ వాడాల్సి వచ్చినప్పుడు ఈ పవర్ బ్యాంక్లు బాగా యూజ్ అవుతాయి. ఇప్పుడు చాలా కంపెనీలు ల్యాప్టాప్ల కోసం పవర్ బ్యాంక్లను అందుబాటులోకి తెచ్చాయి. కొన్ని కంపెనీల పవర్ బ్యాంక్లకు మూడు.. నాలుగు పోర్ట్స్ ఉంటున్నాయి. అవి ల్యాప్టాప్తోపాటు ఇంటర్నెట్ రూటర్ , మొబైల్స్ని కూడా ఛార్జ్ చేయగలవు.
ధర: బ్యాటరీ కెపాసిటీ, క్వాలిటీని బట్టి 3,000 రూపాయల నుంచి అందుబాటులో ఉన్నాయి
