- అనుచరులతో కలిసి దాడి చేసిన బీఆర్ఎస్ కార్పొరేటర్ శ్రీకాంత్
- పోలీస్‌ స్టేషన్‌లో ఫిర్యాదు చేసిన బాధితుడు
మాదాపూర్, వెలుగు: శేరిలింగంపల్లి సెగ్మెంట్లో డబ్బులు పంచుతున్నాడనే అనుమానంతో టీడీపీ నేతపై బీఆర్ఎస్ మియాపూర్ కార్పొరేటర్, అతడి అనుచరులు దాడికి పాల్పడ్డారు. ఈ ఘటన మియాపూర్ పీఎస్ పరిధిలో జరిగింది. బాధితుడు తెలిపిన వివరాల ప్రకారం.. మియాపూర్లోని ఆర్బీఆర్ కాంప్లెక్స్ లో ఉంటున్న నల్లమల్ల రమేశ్ ఇన్వెంట్ ఇంజినీరింగ్ సొల్యూషన్స్లో పనిచేస్తున్నాడు. టీడీపీ నాయకుడైన రమేశ్.. ప్రస్తుతం ఈ ఎన్నికల్లో కాంగ్రెస్ పార్టీకి మద్దతు తెలుపుతున్నాడు. బుధవారం సాయంత్రం బాలు అనే వ్యక్తిని కలిసేందుకు మియాపూర్లోని నదిగడ్డ తండాకు రమేశ్ వెళ్లాడు.
బాలుతో మాట్లాడి వస్తుండగా.. బీఆర్ఎస్ కార్పొరేటర్ ఉప్పలపాటి శ్రీకాంత్, అతడి అనుచరులు రమేశ్ను అడ్డుకున్నారు. డబ్బులు పంచడానికి వచ్చాడనే అనుమానంతో దాడి చేశారు. దీంతో బాధితుడు.. కార్పొరేటర్ శ్రీకాంత్, అతడి అనుచరులపై మియాపూర్ పీఎస్లో కంప్లయింట్ చేశాడు. దాడి విషయం తెలుసుకున్న శేరిలింగంపల్లి కాంగ్రెస్ అభ్యర్థి జగదీశ్వర్ గౌడ్ పీఎస్కు చేరుకుని బాధితుడితో మాట్లాడారు. రమేశ్ కాంగ్రెస్ కు మద్దతు తెలుపుతుండటం, పాత కక్షలను మనుసులో పెట్టుకునే కార్పొరేటర్ శ్రీకాంత్, అతడి అనుచరులు దాడికి పాల్పడినట్లు తెలుస్తోంది.
