ఫిజికల్ ఫిట్నెస్, హెల్దీ లైఫ్ స్టయిల్ కావాలనుకునే చాలామందికి రన్నింగ్ అనేది ముఖ్యమైన ఎక్సర్సైజ్. రన్నింగ్ చేయడం ఈజీ, లాభాలు కూడా చాలానే ఉన్నాయి. అందుకే ఎక్కువమంది రన్నింగ్ చేయడాన్ని ఇష్టపడతారు. అది ఓకే కానీ... ఇందులో కొంత రిస్క్ కూడా ఉంది. రన్నింగ్ పద్ధతిగా చేయకపోతే కొత్త సమస్యలను తెచ్చుకున్నట్టే అంటున్నారు స్పోర్ట్ మెడిసిన్ ఎక్స్పర్ట్స్. రన్నింగ్ చేసేటప్పుడు మరీ ముఖ్యంగా ఓ ఐదు తప్పులు చేయకూడదు. వాటి గురించి తెలుసుకుంటే ప్రాబ్లమ్స్ రాకుండా రన్నింగ్ను ఎంజాయ్ చేయొచ్చట!
రన్నింగ్ చేసేటప్పుడు చేసే కొన్ని తప్పుల వల్ల కీళ్ల మీద ఒత్తిడి పడి... తరువాత పూర్తిగా రన్నింగ్ మానేయాల్సిన పరిస్థితి వస్తుంది. రన్నింగ్లో చేసే పొరపాట్ల వల్ల చీలమండ బెణుకు, ఎముకల్లో సన్నటి పగులు, మోకాలి నొప్పి వంటి సమస్యలు వస్తాయి. ఇవేకాక శరీరాన్ని పూర్తిగా కాకుండా ఒక వైపు మాత్రమే వాడడం, వెన్ను నొప్పి వంటివి కూడా తలెత్తుతాయి. ఆ ఇబ్బంది లేకుండా ఉండాలంటే చేసే ఆ ఐదు తప్పులను తెలుసుకోవాలి. అప్పుడు కీళ్లు కాపాడుకోవచ్చు. నొప్పులు లేకుండా పరిగెత్తొచ్చు.
పెద్ద అంగలు వేయడం
పరిగెత్తేటప్పుడు అంగలు ఎక్కువ దూరం వేయడం వల్ల మోకాళ్ల మీద ఎఫెక్ట్ పడుతుంది. దాంతో కీళ్ల మీద ఒత్తిడి పడుతుంది. అయినా పట్టించుకోకుండా అలానే పరిగెత్తితే కొన్నాళ్లకు మోకాళ్ల మీద పడే ఒత్తిడి ఆర్థరైటిస్కు, కీళ్ల క్షీణతకు కారణం అవుతుంది. ఆ రిస్క్ లేకుండా ఉండాలంటే పెద్ద పెద్ద అంగలు వేయొద్దు. పరిగెత్తేటప్పుడు ఎంత అంగ పడుతుందో అంతే వేయాలి. దానికి మించి చేయకూడదు.
నొప్పిని నిర్లక్ష్యం చేయడం
రన్నింగ్ చేసేవాళ్లు చేసే కామన్ మిస్టేక్... రన్నింగ్ చేసేటప్పుడు అసౌకర్యంగా ఉన్నా పట్టించుకోకపోవడం. నొప్పిని పట్టించుకోకపోతే దీర్ఘకాలిక కీళ్ల నొప్పిని పట్టించుకోనట్టే. అందుకే రన్నింగ్ చేసేటప్పుడు లేదా రన్నింగ్ చేశాక అసౌకర్యంగా అనిపిస్తే శరీరం హెల్త్ అలారమ్ మెసేజ్ ఇస్తున్నట్టు. దాన్ని పట్టించుకోవాలి. వెంటనే మెడికల్ అడ్వైజ్ తీసుకోవాలి.
వామప్స్, కూల్ డౌన్స్ చేయకపోవడం
రన్నింగ్కు ముందు వామప్, ఆ తరువాత కూల్ డౌన్ ఎక్సర్సైజ్లు చేయాలి. అలా చేయకపోతే కీళ్ల గాయాలకు మీరే కారణం అవుతారు. రన్నింగ్ చేశాక చేసే స్ట్రెచెస్ వల్ల రికవరీ, ఫ్లెక్సిబిలిటీ ఉంటాయి. కీళ్ల దగ్గర స్ట్రెయిన్ కాకుండా ఉంటుంది. డైనమిక్ స్ట్రెచెస్ చేయడం, రన్నింగ్ కంటే ముందు చేసే మొబిలిటీ ఎక్సర్సైజ్ వల్ల కీళ్లు మీరు చేసే యాక్టివిటీకి రెడీ అవుతాయి. ఆ తరువాత ఇబ్బంది పెట్టవు.
పూర్ రన్నింగ్
రన్నింగ్ చేసేటప్పుడు మీ శరీరం మరీ ముఖ్యంగా కాళ్లు, పాదాలు ఎలా కదులుతున్నాయి అనేదానిమీద దృష్టి పెట్టాలి. అవేవీ చూసుకోకుండా సరిగా రన్నింగ్ చేయకపోతే కీళ్ల మీద అదనపు ఒత్తిడి పడుతుంది. దానివల్ల ఇంజ్యురీ రిస్క్ పెరుగుతుంది. పాదాన్ని నేల మీద ఆన్చేటప్పుడు పాదం మడమ బయటి నుంచి లోపలికి ఎంత వరకు పడుతుంది అనేది గమనించాలి. దీన్ని స్పోర్ట్స్ భాషలో ఓవర్ ప్రొనేషన్ అంటారు. అలాగే శరీరం ఎలా వంచుతున్నారో చూసుకోవాలి. ఇది హంచింగ్ ఓవర్ అన్నమాట. అంటే రన్నింగ్ చేసేటప్పుడు భుజాలు, వెన్నెముక ఎలా బెండ్ చేస్తున్నారనేది ముఖ్యం.
అలాగే హీల్ స్ట్రైకింగ్ అంటే... పాదాన్ని నేలమీద ఆన్చేటప్పుడు మొదట నేలమీద మడమ పెడితే అప్పుడు శరీరం బరువు అంతా మడమ మీదే పడుతుంది. రన్నింగ్ చేసేటప్పుడు ఈ సమస్యలు గమనిస్తే వాటిని సరి చేసుకున్న తరువాతే రన్నింగ్ చేయాలి. అందుకు ఫిజియోథెరపిస్ట్ లేదా రన్నింగ్ కోచ్తో మాట్లాడాలి.
సరైన ఫుట్వేర్ వాడకపోవడం
ఫిట్ కాని లేదా పాదానికి సపోర్ట్ చేయని షూస్ వేసుకుంటే కీళ్ల మీద ఒత్తిడి పెరుగుతుంది. ఫ్లాట్ సోల్ ఉన్న జీరో డ్రాప్ షూస్ వేసుకోవాలి. ఇవయితే పాదాలకు ఏవీ వేసుకోకుండా నడిస్తే ఎలా ఉంటుందో ఆ ఫీల్ ఇస్తాయి. దానివల్ల అడుగు కదలిక, భంగిమ రెండూ సహజంగా ఉంటాయి. జీరో డ్రాప్ లేదా మినిమలిస్ట్ రన్నింగ్ షూస్కి నెమ్మదిగా మారాలి. అలా అయితేనే గాయాలు అయ్యే అవకాశం తగ్గుతుంది.
ఫిట్నెస్ కోసం రన్నింగ్ చేసే వాళ్లయినా, స్పోర్ట్స్ కోసం ప్రాక్టీస్ చేసే వాళ్లయినా పర్ఫార్మెన్స్ మెరుగుపడాలంటే వారానికి ఒకసారి టెంపో రన్స్ చేయాలి. టెంపో రన్ వల్ల వేగంగా, ఎక్కువ దూరం పరిగెత్తే సామర్ధ్యం మెరుగుపడుతుంది.
ఇక్కడ చెప్పిన జాగ్రత్తలు తీసుకుంటే రన్నింగ్ ఎంజాయ్ చేయొచ్చు. అయితే రన్నింగ్ చేసేటప్పుడు, చేసిన తరువాత నొప్పులు అదేపనిగా వస్తుంటే కనుక మెడికల్ సలహా అనేది చాలా అవసరం. అలాగే పర్సనల్ గైడెన్స్ తీసుకోవాల్సి ఉంటుంది.
