భక్తులు మెచ్చేలా భద్రాద్రి రామాలయాభివృద్ధి : మంత్రి పొంగులేటి శ్రీనివాస్ రెడ్డి

•     భక్తరామదాసు తర్వాత ప్రజాప్రభుత్వంలోనే పనులకు శ్రీకారం
•     పుష్కరాల నాటికి తొలిదశ పనులు పూర్తి చేస్తం
•     మంత్రి పొంగులేటి శ్రీనివాస్​రెడ్డి 

భద్రాచలం, వెలుగు: భక్తులు మెచ్చే, నచ్చే రీతిలో భద్రాచలం శ్రీ సీతారామచంద్రస్వామి ఆలయాభివృద్ధి చేస్తామని మంత్రి పొంగులేటి శ్రీనివాస్​రెడ్డి తెలిపారు. భద్రాచలం రామాలయంలో జరగనున్న తొలిదశ పనులపై బుధవారం సాయంత్రం ఆర్అండ్​బీ, ఎండోమెంట్​ అధికారులతో కలిసి సమీక్షించారు. తొలుత రంగనాయకులగుట్ట వద్ద భూసేకరణ చేపట్టిన చోట హద్దులను నిర్ణయిస్తూ ఏర్పాటు చేసిన జెండాల గురించి ఆరా తీశారు. అటు ఆర్అండ్​బీ ఇటు ఎండోమెంట్​ ఆఫీసర్లు సరైన రీతిలో వివరాలు చెప్పకపోవడంతో అసహనం వ్యక్తం చేశారు. 

మాస్టర్  ప్లాన్​  ప్రకారం జరుగుతున్న పనుల గురించి అడిగి తెలుసుకున్నారు. నాడు భక్తరామదాసు తర్వాత నేడు సీఎం రేవంత్​రెడ్డి ఆధ్వర్యంలోని ప్రజాప్రభుత్వంలోనే ఆలయాభివృద్ధికి అడుగుపడుతుందని పేర్కొన్నారు. మాడవీధుల విస్తరణ, ప్రాకారాల నిర్మాణాలు, ఉపాలయాల్లోని మూర్తుల తరలింపు, తీసుకుంటున్న జాగ్రత్తల గురించి అడిగి తెలుసుకున్నారు. ఆలయంలోని ప్రాకార మండపంలో వైదిక కమిటీ, ఎండోమెంట్, ఆర్అండ్​బీ ఇంజనీర్లతో పాటు స్తపతులతో సమావేశమయ్యారు. 

ఎలాంటి ఆటంకాలు లేకుండా పనులు జరిగేలా ప్రణాళికల ప్రకారం ముందుకు పోవాలన్నారు. రూ.351 కోట్ల పనులన్నీ పుష్కరాల నాటికి పూర్తి చేయాలన్నారు. వేదపండితులు, స్తపతులు,ఆర్కిటెక్​ల సహకారంతో విశాలంగా నిర్మాణాలు చేపడుతున్నట్లు తెలిపారు. రాములవారి దీవెనలతో పనులు పూర్తి చేస్తామన్నారు. భక్తులకు ఇబ్బంది లేకుండా శాస్త్రోక్తంగా ఆలయం నిర్మిస్తామని హామీ ఇచ్చారు. మంత్రి వెంట ఎండోమెంట్​ కమిషనర్​ హన్మంత్​రావు, ఈవో దామోదర్​రావు ఉన్నారు.