చందానగర్, వెలుగు: శేరిలింగంపల్లి సెగ్మెంట్లో భారీ మెజార్టీతో గెలిచి గులాబీ జెండాను మరోసారి ఎగరేస్తానని బీఆర్ఎస్ ఎమ్మెల్యే అభ్యర్థి అరికెపూడి గాంధీ ధీమా వ్యక్తం చేశారు. ఎన్నికల ప్రచారంలో భాగంగా శుక్రవారం చందానగర్ డివిజన్ పరిధి శంకర్నగర్లోని వినాయక దేవాలయంలో ఆయన పూజలు నిర్వహించారు. అనంతరం స్థానిక కార్పొరేటర్తో పాటు బీఆర్ఎస్ నేతలు, కార్యకర్తలతో కలిసి ఇంటింటికి తిరుగుతూ ఆయన ప్రచారం నిర్వహించారు.
కారు గుర్తుకు ఓటేసి తనను గెలిపించాలని కోరారు. ఈ సందర్భంగా గాంధీ మాట్లాడుతూ.. అత్యధిక మెజార్టీతో గెలిచి సీఎం కేసీఆర్ కు తన విజయాన్ని కానుకగా ఇస్తానన్నారు. అన్ని వర్గాలకు అభివృద్ధి, సంక్షేమం దక్కేలా బీఆర్ఎస్ మేనిఫెస్టో ఉందన్నారు.
