- అంగన్వాడీ సిబ్బంది నిర్లక్ష్యం
గండీడ్, వెలుగు: నీళ్లు అనుకొని పొరపాటున ఓ చిన్నారి టర్పెంట్ ఆయిల్ తాగింది. మహబూబ్నగర్ జిల్లా మహమ్మదాబాద్ మండలంలోని సంగాయిపల్లి తండాలో ఈ ఘటన జరిగింది. గ్రామస్తులు తెలిపిన ప్రకారం.. తండాలోని ప్రాథమిక పాఠశాలలో ఓ గదిలో అంగన్వాడీ కేంద్రం నిర్వహిస్తున్నారు. ఇటీవల స్కూళ్లు రీ ఓపెన్ కావడంతో రంగులు వేశారు. రంగులో కలపడానికి తీసుకొచ్చిన టర్పెంట్ ఆయిల్ కొంత మిగలగా అక్కడే వదిలేశారు.
శుక్రవారం అంగన్వాడీలో చదువుకుంటున్న మూడేళ్ల పాప నీళ్లు అనుకుని టర్పెంట్ ఆయిల్ను నోట్లో పోసుకుంది. ఇంటికి వెళ్లాక నీరసంగా ఉండడంతో తల్లిదండ్రులు సాయంత్రం మహమ్మదాబాద్ లోని ప్రైవేట్ ఆస్పత్రిలో చూపించి ఇంటికి తీసుకెళ్లారు. రాత్రివేళ పరిస్థితి విషమించడంతో మెరుగైన వైద్యం కోసం మహబూబ్ నగర్ లోని ప్రైవేట్ హాస్పిటల్కు తరలించారు. బాలిక పరిస్థితి సీరియస్ గా ఉన్నట్లు తెలిసింది.
