వనపర్తి, వెలుగు: వచ్చే పార్లమెంట్ ఎన్నికల్లో అధికారులు నిష్పక్షపాతంగా డ్యూటీ చేయాలని కలెక్టర్ తేజస్ నందలాల్ పవార్ ఆదేశించారు. గురువారం కలెక్టరేట్ లోని ప్రజావాణి హాల్లో పార్లమెంటు ఎన్నికల నిర్వహణపై ఎస్పీ రక్షిత కృష్ణమూర్తితో కలిసి నోడల్, సెక్టోరియల్ ఆఫీసర్లు, ఎస్ఎస్టీ, ఎఫ్ఎస్టీ టీమ్స్, పోలీస్ ఆఫీసర్లతో ఎన్నికల నిర్వహణ, బాధ్యతల పై అవగాహనా, శిక్షణా కార్యక్రమాన్ని నిర్వహించారు.
ఈ సందర్భంగా కలెక్టర్ మాట్లాడుతూ ఎన్నికల విధుల్లో తప్పులు జరగకుండా చూసుకోవాలన్నారు. శాంతిభద్రతల సమస్య తలెత్తకుండా ఏర్పాట్లు చేయాలని పోలీస్ ఆఫీసర్లకు సూచించారు. అధికారులు రాజకీయ నాయకులను కలవడం, రాజకీయ కార్యకలాపాల్లో పాల్గొనడం చేయవద్దని సూచించారు. ఎస్పీ మాట్లాడుతూ ఎన్నికల సమయంలో శాంతి భద్రతల పరిరక్షణ విషయంలో అప్రమత్తంగా ఉండాలని సూచించారు. బెల్ట్ షాపులు, బైండోవర్ కేసుల విషయంలో పక్కాగా ఉండాలన్నారు. అడిషనల్ కలెక్టర్లు సంచిత్ గంగ్వార్, ఎం నగేశ్, డీఎఫ్ వో నవీన్, ఆర్డీవో పద్మావతి, డీఎస్పీ వెంకటేశ్వర్ పాల్గొన్నారు.
పెండింగ్ సీఎంఆర్ వెంటనే ఇవ్వాలి
మూడేండ్లుగా పెండింగ్లో ఉన్న సీఎంఆర్ ను వెంటనే అందించాలని కలెక్టర్ తేజస్ నందలాల్ పవార్ ఆదేశించారు. గురువారం తన చాంబర్లో జిల్లా రైస్ మిల్లర్ల అసోసియేషన్ సభ్యులు, సివిల్ సప్లై ఆఫీసర్లతో సమావేశం నిర్వహించారు. ఈ సందర్భంగా కలెక్టర్ మాట్లాడుతూ, 2020-–21, 2021–-22 సంవత్సరాల ఖరీఫ్, రబీ సీజన్లకు సంబంధించిన 430 ఏసీకేల బియ్యం సివిల్ సప్లయ్కి, 2022–-23 రబీ సీజన్కు సంబంధించి పెండింగ్లో ఉన్న 546 ఏసీకేల బియ్యాన్ని ఎఫ్సీఐకి అప్పగించాలన్నారు. 2023–-24 ఖరీఫ్ సీజన్కు సంబంధించి 71 మంది రైస్ మిల్లర్లు 4,418 ఏసీకేల ధాన్యాన్ని కూడా వీలైనంత త్వరగా అందించాలని ఆదేశించారు. అడిషనల్ కలెక్టర్లు నగేశ్, సంచిత్ గంగ్వార్ పాల్గొన్నారు.
