శామీర్ పేట, వెలుగు: తీసుకున్న అప్పు చెల్లించలేక ఓ వ్యక్తి ఉరేసుకొని ఆత్మహత్య చేసుకున్న ఘటన మేడ్చల్ జిల్లా శామీర్ పేట పీఎస్ పరిధిలో జరిగింది. పొన్నాల గ్రామానికి చెందిన ఆనంద్ (23) ప్రజ్ఞాపూర్కు చెందిన యశోద నుంచి 3 నెలల క్రితం రూ.10 వేలు అప్పుగా తీసుకున్నాడు. గడువు ముగిసినా డబ్బులు ఇవ్వకపోవడంతో ఆమె గతంలో ఆనంద్ ఇంటికి వచ్చి గొడవ చేసింది. దీంతో ఆనంద్ సోదరుడు ఆ డబ్బులను తాను ఇస్తానని ఆమెతో చెప్పాడు. . రోజులు గడిచినా డబ్బులు ఇవ్వకపోవడంతో శనివారం యశోద కొంతమందితో కలిసి మరోసారి ఆనంద్ ఇంటికి వచ్చి డబ్బులు తిరిగివ్వాలని గొడవ చేసింది. తీవ్ర మనస్తాపానికి గురైన ఆనంద్ ఇంటి ముందు గొడవ జరుగుతుండగానే లోపలికి వెళ్లి ఉరేసుకున్నాడు. పోలీసులు కేసు ఫైల్ చేసి దర్యాప్తు చేస్తున్నారు.
