ట్యాంక్ బండ్, వెలుగు: వ్యవసాయరంగంలో వస్తున్న సాంకేతికతను దృష్టిలో పెట్టుకొని పెను మార్పులు తీసుకొచ్చేందుకు రాష్ట్ర ప్రభుత్వం ప్రణాళికబద్ధంగా ముందుకెళ్తోందని మంత్రి తుమ్మల నాగేశ్వర్రావు తెలిపారు. యువత సైతం ఐటీ రంగాన్ని, పెద్ద పెద్ద ఉద్యోగాలను వదిలిపెట్టి వ్యవసాయ రంగం వైపు చూస్తున్నారని పేర్కొన్నారు.
హైదరాబాద్ ఎన్టీఆర్ స్టేడియంలో మూడు రోజులుగా కొనసాగుతున్న రైతు బడి అగ్రిషోకు ఆదివారం మంత్రి హాజరై స్టాళ్లను పరిశీలించి, వివరాలు అడిగి తెలుసుకున్నారు. ఈ సందర్భంగా ఆయన మాట్లాడుతూ తాను రైతు బిడ్డనేనని, ప్రతిరోజు వ్యవసాయ పనులను పరిశీలిస్తానని, ఆ తర్వాతనే ప్రజలకు సేవ చేసే కార్యక్రమాల్లో పాల్గొంటానని చెప్పారు.
రాష్ట్రంలో ఆయిల్ పామ్ సాగు చేయాలని సూచించారు. అనేక కంపెనీలు రైతుల వద్దకు నేరుగా వెళ్లి వ్యవసాయ పనిముట్లపై అవగాహన కల్పిస్తే, వాటికి సబ్సిడీ ఇప్పించేందుకు రాష్ట్ర ప్రభుత్వం చర్యలు తీసుకుంటుందని తెలిపారు.
జూబ్లీహిల్స్ కు మంచి రోజులు..
జూబ్లీహిల్స్: జూబ్లీ హిల్స్ నియోజకవర్గానికి మంచి రోజులు వస్తాయని మంత్రి తుమ్మల నాగేశ్వర్రావు తెలిపారు. ఉప ఎన్నికలో మధురానగర్ కాలనీవాసులకు ఇచ్చిన హామీని నెరవేర్చడంలో భాగంగా ఎమ్మెల్యే నవీన్ యాదవ్ తో కలిసి కాలనీవాసులతో సమావేశం నిర్వహించారు. రాయల నాగేశ్వరరావు, బండి రమేశ్, చిన్న శ్రీశైలం యాదవ్ పాల్గొన్నారు.
