తెలంగాణ ప్రభుత్వం కరోనా వ్యాప్తిని నియంత్రించడంలో విజయవంతమైందన్నారు మంత్రి కేటీఆర్. గత ఆరు నెలలుగా వైద్య, ఆరోగ్య శాఖ అద్భతంగా పని చేసిందని… మంత్రి ఈటల రాజేందర్ ఆధ్వర్యంలో మంచి పనితీరును కనపరిచిందన్నారు. హెల్త్ సెక్రటరీ నుంచి ఆశా వర్కర్క్ వరకు ప్రతి ఒక్కరూ తమ వంతు బాధ్యతను నిర్వర్తించారన్నారు. ప్రజల్లో భరోసాను కల్పించారని అన్నారు. ఇతర రాష్ట్రాలలో కరోనా కేసులు పెరుగుతుంటే… మన రాష్ట్రంలో మాత్రం అదుపులో ఉందని చెప్పారు కేటీఆర్.
ఈ ఆరు నెలల్లోనే కాకుండా గత ఆరేళ్లుగా వైద్య, ఆరోగ్యశాఖ మంచిగా పని చేసిందన్నారు మంత్రి కేటీఆర్. మాతాశిశు మరణాల రేటును తగ్గించిందని, ఐసీయూ యూనిట్లు, బ్లడ్ బ్యాంకులు, డయాలసిస్ కేంద్రాల ఏర్పాటు వంటి అనేక కార్యక్రమాలను నిర్వహించిందని తెలిపారు. సీజనల్ వ్యాధులు, రోగాల పట్ల ప్రజల్లో కూడా అవగాహన పెరిగిందన్నారు. రానున్న రోజుల్లో మెడికల్ ఇన్ఫ్రాస్ట్రక్చర్ ని మరింత బలోపేతం చేసే దిశగా ప్రభుత్వం పని చేస్తుందని చెప్పారు మంత్రి కేటీఆర్.
