బెంగళూరు: తన కూతురు వేరే కులానికి చెందిన వ్యక్తిని పెండ్లి చేసుకోబోతోందన్న కోపంతో కన్న తండ్రే ఆమె గొంతు కోశాడు. ఆపై ఆమెను ఫ్యాన్కు ఉరివేశాడు. తన ప్రియురాలు లేదని తెలిసి ఆమె ప్రియుడు తల్లడిల్లిపోయాడు. ఆమె లేని జీవితం వద్దనుకుని రైలు కింద పడి ఆత్మహత్య చేసుకున్నాడు. కర్నాటక కోలార్ గోల్డ్ ఫీల్డ్స్ (కేజీఎఫ్) లోని బంగారు పేటలో బుధవారం ఈ ఘటన జరిగింది.
ఆత్మహత్యగా నమ్మించేందుకు ఉరివేసిండు..
బంగారుపేటకు చెందిన కృష్ణమూర్తి కూతురు కీర్తి(20) వేరే కులానికి చెందిన గంగాధర్(24) అనే వ్యక్తిని ప్రేమించింది. ఈ విషయం తెలిసి తండ్రి ప్రశ్నించగా ఆమె అతడినే పెండ్లి చేసుకుంటానని చెప్పింది. తాపీ మేస్త్రీగా పనిచేస్తున్న గంగాధర్ను, కీర్తిని తండ్రి కృష్ణమూర్తి పలుమార్లు హెచ్చరించినప్పటికీ వారు వినిపించుకోలేదు. పెద్దలను ఎదిరించైనా పెండ్లి చేసుకునేందుకు సిద్ధపడ్డారు. ఇదే విషయంలో తండ్రీకూతుళ్ల మధ్య బుధవారం వాగ్వాదం జరిగింది. కోపం పట్టలేక కృష్ణమూర్తి కూతురు గొంతు కోసి చంపేశాడు. ఆత్మహత్యగా చిత్రీకరించేందుకు డెడ్బాడీని ఫ్యాన్కు తాడుతో వేలాడదీశాడు. ఈ విషయం గంగాధర్కు తెలియడంతో తట్టుకోలేకపోయాడు. రైలు కిందపడి ప్రాణాలు తీసుకున్నాడు. పరువు హత్యగా అనుమానించిన పోలీసులు కృష్ణమూర్తిని విచారించి అరెస్ట్ చేశారు.
