- కాలుష్యకారక సిటీల్లో నంబర్ వన్ రాజస్థాన్లోని భివాడీ
- టాప్ 15లో 10.. టాప్ 100లో 63 సిటీలు మనవే
- స్విట్జర్లాండ్కు చెందిన ఐక్యూఎయిర్ స్టడీలో వెల్లడి
న్యూఢిల్లీ: ప్రపంచంలోనే అత్యంత కాలుష్యకారక రాజధానిగా ఢిల్లీ అతిచెత్త రికార్డును మూటగట్టుకుంది. 2021కి సంబంధించి 117 దేశాల్లోని 6,475 సిటీలపై స్విట్జర్లాండ్కు చెందిన ఐక్యూఎయిర్ అనే సంస్థ కాలుష్యంపై స్టడీ చేసింది. ఆ నివేదికను మంగళవారం విడుదల చేసింది. కాలుష్యం ఎక్కువగా నమోదవుతున్న సిటీల జాబితాలో రాజస్థాన్లోని భివాడీ, యూపీ సిటీ ఘజియాబాద్లు మొదటి రెండు స్థానాల్లో నిలిచాయి. కాలుష్యం ఎక్కువగా నమోదవుతున్న టాప్ 15 సిటీల్లో 10, టాప్ 100లో 63 సిటీలు మన దేశం నుంచే ఉన్నట్టు రిపోర్ట్ వెల్లడించింది. మన దేశంలోని ఏ ఒక్క సిటీ కూడా డబ్ల్యూహెచ్వో పెట్టిన స్టాండర్డ్కు తగ్గట్టుగా లేవని పేర్కొంది. దేశంలోని 48 శాతం సిటీల్లో పీఎం 2.5 స్థాయులు క్యూబిక్ మీటరుకు 58.1 మైక్రోగ్రామ్లుగా ఉందని, డబ్ల్యూహెచ్వో పెట్టిన 5 మైక్రోగ్రాముల లిమిట్ కన్నా పది రెట్లు ఎక్కువగా కాలుష్యం నమోదవుతోందని తెలిపింది. ఢిల్లీలో కాలుష్యకారక పీఎం 2.5 స్థాయి 2021లో 14.6 శాతం పెరిగిందని, క్యూబిక్ మీటరుకు 96.4 మైక్రోగ్రాముల మేర పీఎం 2.5 ఉంటోందని వెల్లడించింది. అంతకుముందు ఏడాదిలో 84 మైక్రోగ్రాములుగా ఉండేదని పేర్కొంది. కాగా, కాలుష్యకారక రాజధానుల జాబితాలో ఢిల్లీ తర్వాత బంగ్లాదేశ్ రాజధాని ఢాకా రెండో స్థానంలో నిలిచింది. ఆ తర్వాతి స్థానాల్లో ఛాడ్ క్యాపిటల్ నజమీనా, తజికిస్థాన్ రాజధాని దుషాంబి, ఒమన్ రాజధాని మస్కట్లు నిలిచాయి.
టాప్15 పొల్యూటెడ్ సిటీలు
భివాడీ (రాజస్థాన్), ఘజియాబాద్(యూపీ), హోటాన్ (చైనా), ఢిల్లీ, జౌన్పూర్ (యూపీ), ఫైసలాబాద్ (పాకిస్తాన్), నోయిడా (యూపీ), బహవల్పూర్ (పాకిస్తాన్), పెషావర్ (పాకిస్తాన్), బాగ్పట్ (యూపీ), హిసార్ (హర్యానా), ఫరీదాబాద్(హర్యానా), గ్రేటర్ నోయిడా (యూపీ), రోహ్టక్ (హర్యానా),
లాహోర్ (పాకిస్తాన్)
అన్ని దేశాల్లోనూ అంతే
ప్రపంచంలోని ఏ దేశమూ కాలుష్యంపై డబ్ల్యూహెచ్వో నిర్దేశించిన ప్రమాణాలను అందుకోలేదని స్టడీ తేల్చింది. కాలుష్యం ఎక్కువగా ఉన్న దేశాల లిస్ట్లో బంగ్లాదేశ్ మొదటి స్థానంలో నిలిచింది. తర్వాతి స్థానంలో ఛాడ్ ఉంది. చైనాలో కూడా ఇప్పుడు పరిస్థితి దిగజారిందని రిపోర్ట్ వెల్లడించింది. గాలి నాణ్యత విషయంలో చైనా 14వ స్థానం నుంచి 22వ ర్యాంకుకు పడిపోయినట్టు తెలిపింది. కాగా, స్టడీ చేసిన 6,475 సిటీల్లో కేవలం 3.4 శాతం నగరాలే ఆ డబ్ల్యూహెచ్వో ప్రమాణాలకు
తగ్గట్టున్నాయని చెప్పింది.