న్యూఢిల్లీ: నీట్ 2026 పేపర్ లీక్కు నైతిక బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ తన పదవికి రాజీనామా చేయాలని డిమాండ్ చేస్తూ కాక్రోచ్ జనతా పార్టీ చేస్తోన్న ఆందోళనపై ఢిల్లీ హైకోర్టు కీలక వ్యాఖ్యలు చేసింది. ఈ వివాదంలోకి మమ్మల్ని లాగొద్దని న్యాయస్థానం పేర్కొంది. ఢిల్లీలో నిరసనలు తెలుపుతున్న విద్యార్థులపై పోలీసులు తీవ్రస్థాయిలో బలప్రయోగం చేశారంటూ దాఖలైన పిటిషన్ను అత్యవసరంగా విచారించేందుకు కోర్టు నిరాకరించింది.
అసలేం జరిగిందంటే..?
నీట్ 2026 పేపర్ లీక్, విద్యార్థుల మరణాలకు నైతిక బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ తన పదవికి రాజీనామా చేయాలని డిమాండ్ చేస్తూ జులై 20న కాక్రోచ్ జనతా పార్టీ పార్లమెంట్ మార్చ్ (చలో సంసద్)కు పిలుపునిచ్చిన విషయం తెలిసిందే. ఈ పార్లమెంట్ మార్చ్ కార్యక్రమం తీవ్ర ఉద్రిక్తతలకు దారి తీసి హింసాత్మకంగా మారింది. ఆందోళనకారులపై పోలీసులు విచక్షణరహితంగా లాఠీచార్జ్ చేశారు.
నిరసనను అణిచివేసేందుకు ఆందోళనకారులపై టియర్ గ్యాస్ ప్రయోగించారు. ఈ క్రమంలోనే శాంతియుతంగా నిరసన వ్యక్తం చేస్తోన్న సీజేపీ ఆందోళనకారులపై పోలీసుల మితిమీరిన బల ప్రయోగాన్ని సవాల్ చేస్తూ ఢిల్లీ హైకోర్టులో పిటిషన్ దాఖలైంది. ఈ పిటిషన్పై అత్యవసర విచారణ చేపట్టి ఆందోనకారులకు న్యాయ సహయం అందించాలని పిటిషనర్ అభ్యర్థించారు.
మంగళవారం (జులై 21) ఈ పిటిషన్ను పరిశీలించిన ఢిల్లీ హైకోర్టు చీఫ్ జస్టిస్ దేవేంద్ర కుమార్ ఉపాధ్యాయ, జస్టిస్ తేజస్ కరియాలతో కూడిన ధర్మాసనం ఈ పిటిషన్ను అత్యవసరంగా విచారించేందుకు నిరాకరించింది. ఈ సందర్భంగా ధర్మాసనం కీలక వ్యాఖ్యలు చేసింది. ఇలాంటి రాజకీయ, వీధి పోరాటాల వివాదాల్లోకి న్యాయవ్యవస్థను లాగొద్దని పిటిషనర్ను ధర్మాసనం మందలించింది. ఈ పిటిషన్ను బుధవారం (జూలై 22) సాధారణ ప్రక్రియలో భాగంగా విచారణకు స్వీకరిస్తామని కోర్టు పేర్కొంది.
