గురుగ్రామ్: వయసులో ఉన్న కుర్రాళ్లు, చేతిలో కారుంది, రోడ్లు ఖాళీగున్నయ్.. ఇంకేముందు కారు తీసి అలా షికారుకు వెళ్లారు. బండ్లోనే మందేస్తూ చిందేశారు. అంతటితో కిక్కు రాలేదో ఏమో.. అందులోని ఓ యువకుడు కారు టాప్ మీదికెక్కి పుషప్స్ తీయడం మొదలు పెట్టాడు. మిగతా ముగ్గురు ఫ్రెండ్స్ కారు డోర్లమీద కూచుని కేకలు వేస్తూ ఎంకరేజ్ చేశారు. అలా డేంజరెస్ పొజిషన్లోనే బీరు తాగుతూ హల్ చల్ చేశారు.
మంగళవారం రాత్రి హర్యానాలోని గురుగ్రామ్ సిటీలో జరిగిన సీన్ ఇది. వెనకాలే కారులో వస్తున్న ఓ వ్యక్తి.. వీళ్ల హంగామాను వీడియో తీసి ట్విట్టర్లో షేర్ చేశాడు. ఆ వీడియో వైరల్ అయి ట్రాఫిక్ పోలీసులదాకా పోయింది. బండి నంబర్తో అడ్రస్ ట్రేస్ చేసి కారును స్వాధీనం చేసుకున్నారు. ఓనర్కు రూ.6,500 పెనాల్టీ వేశారు. యువకులపై కేసు పెట్టి, పుషప్స్ తీసిన వ్యక్తిని అరెస్టు చేశారు. రోడ్లమీద ఇలాంటి పిచ్చి చేష్టలను సహించబోమని ట్రాఫిక్ పోలీసులు హెచ్చరించారు.