హైదరాబాద్, వెలుగు: రాష్ట్రంలోని అంగన్వాడీ సెంటర్లకు ఈ నెల 27 నుంచి వచ్చే నెల 3 వరకు రాష్ట్ర ప్రభుత్వం సెలవులు మంజూరు చేసే అవకాశం ఉంది. అంగన్వాడీ టీచర్లు, హెల్పర్ల విజ్ఞప్తి మేరకు మహిళా, శిశు సంక్షేమ శాఖ మంత్రి సీతక్క ఈ విషయంపై రెండ్రోజుల్లో అధికారికంగా నిర్ణయం తీసుకోనున్నారు. రాష్ట్ర పండుగ బతుకమ్మ, దసరాను అంగన్వాడీ టీచర్లు, హెల్పర్లు కూడా జరుపుకోవాలనే ఉద్దేశంతో మంత్రి సీతక్క సెలవుల ప్రతిపాదనకు సానుకూలంగా ఉన్నారని అధికారులు తెలిపారు.
దసరా సెలవుల్లో కూడా అంగన్వాడీ సెంటర్ల పరిధిలోని పిల్లలు, గర్భిణులు, బాలింతలకు పౌష్టికాహారాన్ని టేక్ హోమ్ రేషన్ పద్ధతిలో ఇండ్లకే పంపిణీ చేయనున్నారు. ఈ మేరకు బుధవారం సెక్రటేరియెట్‌‌లో ఐఎన్టీయూసీ అనుబంధ తెలంగాణ స్టేట్ ఇందిరా ప్రియదర్శిని అంగన్వాడీ టీచర్స్ అండ్ వర్కర్స్ యూనియన్ ప్రతినిధులు మంత్రి సీతక్కను కలిసి, సెలవులపై విజ్ఞప్తి చేశారు.
