టెక్ ప్రపంచంలో పెద్దపెద్ద చదువులు, డిగ్రీలకు ప్రాధాన్యత తగ్గిపోతోంది. గూగుల్ డీప్‌మైండ్ జాబ్ ఓపెనింగ్ నైపుణ్యాలకే పెద్దపీట వేస్తున్నారనే చర్చకు సరికొత్త ఊపునిచ్చింది. AI కోడింగ్ ఏజెంట్ల కోసం పనిచేసే 'పోలారిస్' అనే సరికొత్త బృందంలో ఉద్యోగాల కోసం కంపెనీ ఒక ప్రకటన విడుదల చేసింది. ఈ ఉద్యోగానికి ఎటువంటి అధికారిక డిగ్రీ అనుభవం అవసరం లేదని స్పష్టం చేయడం సోషల్ మీడియాలో హాట్ టాపిక్‌గా మారింది. కేవలం క్లిష్టమైన సమస్యలను పరిష్కరించే ప్రతిభ, అసాధారణమైన టెక్నికల్ స్కిల్స్ ఉంటే చాలనేది కంపెనీ పేర్కొన్న అర్హత.
ఈ రిక్రూట్‌మెంట్‌కు సంబంధించి గూగుల్ ఇంజనీర్ తమే బెసిరోగ్లు ఎక్స్ వేదికగా పంచుకున్న పోస్ట్ నెట్టింట వైరల్ అయింది. ఈ రోల్ కోసం వార్షిక వేతనం భారతీయ కరెన్సీలో సుమారు రూ.11 కోట్ల వరకు ఉంటుందని తెలిపారు. ఎటువంటి డిగ్రీ అవసరం లేదని, అభ్యర్థుల మేధస్సు, కఠినమైన సమస్యలను పరిష్కరించగల సామర్థ్యమే తమకు ముఖ్యమని పేర్కొన్నారు. ఈ భారీ ప్యాకేజీ, డిగ్రీ నిబంధన లేకపోవడం టెక్కీలను విపరీతంగా ఆకర్షిస్తోంది.
ఈ నియామక ప్రకటన టెక్ ప్రపంచంలో డిగ్రీల పాత్రపై మళ్లీ పెద్ద ఎత్తున చర్చకు తెరలేపింది. సంప్రదాయ విద్యా అర్హతల కంటే ప్రాక్టికల్ నైపుణ్యాలు, సమస్యలను పరిష్కరించే సామర్థ్యానికే కంపెనీలు అధిక ప్రాధాన్యత ఇవ్వాలని పలువురు నెటిజన్లు అభిప్రాయపడ్డారు. ప్రతిభ ఉన్న నిపుణులకు ఇది చాలా ఉత్తేజకరమైన సమయమని, డిగ్రీ ఆధారిత స్క్రీనింగ్‌కు స్వస్తి చెప్పి స్కిల్-బేస్డ్ హైరింగ్ విధానాన్ని మరిన్ని సంస్థలు పాటించాలని యూజర్లు బలంగా వాదిస్తున్నారు.
భవిష్యత్తులో సాంకేతిక రంగం ఎంత వేగంగా మారుతుందో చెప్పడానికి ఈ ఘటనే ప్రత్యక్ష ఉదాహరణ. పెద్ద కంపెనీలు సైతం కాగితాలపై ఉండే సర్టిఫికెట్ల కంటే అభ్యర్థుల వాస్తవ ప్రతిభను కొలమానంగా తీసుకోవడం శుభపరిణామం. ఈ విధానం రాబోయే రోజుల్లో రిక్రూట్మెంట్ ప్రక్రియలన్నింటిలోనూ పెద్ద మార్పులకు నాంది పలుకుతుందని నిపుణులు అంచనా వేస్తున్నారు.
