వెలుగు బిజినెస్ డెస్క్: మైక్రోసాఫ్ట్ సపోర్టుతో దూసుకెళ్తున్న చాట్జీపీటీకి పోటీగా తాము బార్డ్ను తేనున్నట్లు గూగుల్ సీఈఓ సుందర్ పిచాయ్ ప్రకటించడంతో ఈ రంగంలో పోటీ వేడెక్కనుంది. చైనా కంపెనీ బైదూ కూడా తమ ఆర్టిఫిషియల్ ఇంటెలిజెన్స్ (ఏఐ) టూల్ ఎర్నీని తేనున్నట్లు వెల్లడించింది. రాబోయే కొన్ని వారాలలోనే తమ ఏఐ టూల్బార్డ్ అందుబాటులోకి వస్తుందని సుందర్ పిచాయ్ ఒక బ్లాగ్పోస్టులో తెలిపారు. మనిషిలాగే మాటలు సాగించగలగడంతోపాటు, అడిగిన ప్రశ్నలకు బదులివ్వడమూ, వ్యాసాలు రాయడమూ, అంతెందుకు సాఫ్ట్వేర్ కోడ్ కూడా రాసేయడం ఆర్టిఫిషియల్ ఇంటెలిజెన్స్ టూల్స్తో సాధ్యపడుతుంది. కిందటేడాది నవంబర్లో ఓపెన్ ఏఐ ఇంక్ తెచ్చిన చాట్జీపీటీ (ఏఐ టూల్) మార్కెట్లో సంచలనాన్నే సృష్టిస్తోంది. సోషల్ మీడియా యాప్స్ టిక్టాప్, ఇన్స్టా కంటే వేగంగా ఎక్కువ మంది యూజర్లను సంపాదించడంలో చాట్ జీపీటీ సక్సెసయింది. 10 కోట్ల మంది యూజర్లను తెచ్చుకోవడానికి టిక్టాక్ కు 9 నెలలు, ఇన్స్టాగ్రామ్కి రెండేళ్లు పైన పడితే, రెండు నెలల్లోనే 10 కోట్ల మంది యూజర్లను చాట్ జీపీటీ ఆకట్టుకోగలిగిందంటే ఏ రేంజ్లో దూసుకెళ్తోందో మనం తెలుసుకోవచ్చు. సెన్సర్టవర్ ఈ డేటా వెల్లడించినట్లు రాయిటర్స్ పేర్కొంది. చాట్ జీపీటీ సక్సెస్తో పోటీదారులు కళ్లు తెరిచారు. చాట్జీపీటీ పేరెంట్ కంపెనీ ఓపెన్ఏఐ లో మైక్రోసాఫ్ట్ పెట్టుబడి ప్రకటించడం అందరినీ ఆశ్చర్యపరిచింది. ఓపెన్ఏఐలో మైక్రోసాఫ్ట్ 10 బిలియన్ డాలర్ల దాకా పెట్టుబడి పెట్టడంతో ఇతర టెక్ కంపెనీలు గూగుల్, బైదు వంటివి తమ సొంత ఏఐ చాట్బాట్స్ను తేవడానికి ప్రయత్నాలు ముమ్మరం చేశాయి.
గూగుల్ బార్డ్..
కొంత మంది నమ్మకమైన టెస్టర్లకు బార్డ్ పేరుతో తమ ఏఐ చాట్బాట్ను అందుబాటులోకి తెచ్చినట్లు సుందర్ పిచాయ్ ప్రకటించారు. ఆ తర్వాత వారాలలో దానిని ప్రజలకూ అందుబాటులోకి తేనున్నట్లు వెల్లడించారు. రెండేళ్ల కిందటే మేం లాంగ్వేజ్ మోడల్ ఫర్ డైలాగ్ అప్లికేషన్స్ (లామ్డా) పేరుతో నెక్స్ట్ జనరేషన్ లాంగ్వేజ్ టూల్ తెచ్చాము. ఇప్పుడు లామ్డా పవర్తో పనిచేసే ఏఐ సర్వీస్ బార్డ్ను తెస్తున్నామని సుందర్ పిచాయ్ తన బ్లాగ్పోస్టులో వివరించారు. పార్టీ ప్లానింగ్ కోసం టిప్స్ ఇవ్వడం మొదలు, లంచ్ ఐడియాలు, రిఫ్రిజిరేటర్లో ఏ ఫుడ్ మిగిలిపోయిందనే వివరాల దాకా అన్నింటినీ బార్డ్ అందించడగలుగుతుందని ఆయన పేర్కొన్నారు.
బైదూ ఎర్నీ..
ఎన్హాన్స్డ్ రిప్రజెంటేషన్ థ్రూ నాలెడ్జ్ ఇంటిగ్రేషన్ (ఎర్నీ) పేరుతో బైదూ కూడా పోటీకి దిగుతోంది. చైనాకు చెందిన బైదు సెర్చ్ ఇంజిన్ ఆ దేశంలో చాలా పాపులర్ అనే విషయం తెలిసిందే. 2019 నుంచే ఎర్నీకి మెరుగులు దిద్దుతున్నట్లు బైదు వెల్లడించింది.
ఓపెన్ ఏఐ చాట్బాట్..ఏది అడిగినా రాసిస్తది
జనరేటివ్ ప్రిట్రెయిన్డ్ ట్రాన్స్ఫార్మర్ (జీపీటీ) సిరీస్ మోడల్స్లో మొదటిదానిని 2019 లోనే ఓపెన్ ఏఐ తెచ్చింది. చాలా టాపిక్స్పై ప్రశ్నలకు టెక్స్ట్ రూపంలో బదులిచ్చే సామర్ధ్యం దాని సొంతం. ఒక రకమైన న్యూరల్ నెట్వర్క్ (ట్రాన్స్ఫార్మర్ ఆర్కిటెక్చర్) ను ఇది ఆధారంగా చేసుకుంది. నేచురల్ లాంగ్వేజ్ ప్రాసెసింగ్ టాస్క్లను ఈ నెట్వర్క్ చాలా ఎఫెక్టివ్గా హ్యాండిల్ చేస్తుంది. అకడమిక్ అవసరాలకు కూడా చాట్జీపీటీ ని వాడుతున్నట్లు సమాచారం. అమెరికాలోని స్టూడెంట్లు తమ వ్యాసాలు (ఎస్సేస్) రాయమని చాట్ జీపీటీని అడుగుతున్నట్లు రిపోర్టులు వస్తున్నాయి.