ఉప్పల్, వెలుగు: బిజినెస్ అవకాశాల కోసం సోషల్ మీడియాలో సెర్చ్ చేసిన ఓ టీచర్.. సైబర్ నేరగాళ్ల ఉచ్చుకు చిక్కి లక్షలాది రూపాయలు పోగొట్టుకున్నారు. రామంతాపూర్ ప్రాంతానికి చెందిన ప్రైవేటు టీచర్ రాజ్యలక్ష్మి బిజినెస్ అవకాశాల కోసం సోషల్ మీడియాలో సెర్చ్ చేశారు. ఫిబ్రవరిలో ఫేస్బుక్లో వచ్చిన ఒక ప్రకటనను చూసి గూగుల్ ఫామ్ ఫిల్ చేశారు. అనంతరం ఆమెను ‘అమెజాన్ హబ్ పార్ట్నర్’ ప్రతినిధిగా ఓ వ్యక్తి కాల్లో పరిచయం చేసుకుని నమ్మబలికాడు.
తొలుత రిజిస్ట్రేషన్ ఫీజు పేరుతో రూ. 17,700 వసూలు చేసి, ఆపై డెలివరీ కిట్ కోసం మరో రూ. 1,50,000 కట్టాలని, ఆ డబ్బు వెంటనే తిరిగి ఇచ్చేస్తామని నమ్మించాడు. దీంతో ఆమె విడతలవారీగా మరో రూ. 84,335 చెల్లించారు. మిగిలిన డబ్బు కోసం ఒత్తిడి చేయడంతో తన డబ్బు తిరిగి ఇవ్వాలని ఆమె కోరారు. ఆ మొత్తాన్ని ఐదేండ్ల తర్వాతే ఇస్తామంటూ పొంతన లేని సమాధానాలు చెప్పాడు. దీంతో మోసపోయానని గ్రహించిన బాధితురాలు శుక్రవారం సైబర్ క్రైమ్ హెల్ప్లైన్తో పాటు ఉప్పల్ పోలీసులకు ఫిర్యాదు చేయగా, కేసు నమోదు చేసి దర్యాప్తు చేస్తున్నారు.
