- ఆన్లైన్ క్లాసులు మాత్రమే జరుగుతాయని ప్రకటన
- వీసీ బిల్డింగ్ ఎదుట విద్యార్థుల ఆందోళన
- ఉద్యమాన్ని నీరుగార్చేందుకేనని ఆరోపణ
హనుమకొండ, వెలుగు: కాకతీయ యూనివర్సిటీలో నాన్ బోర్డర్లను ఖాళీ చేయించే పేరుతో క్యాంపస్ లోని కాలేజీలు, హాస్టళ్లకు ఇదివరకే సెలవులు ప్రకటించిన అధికారులు... వాటిని ఈ నెల18వ తేదీ వరకు పొడిగిస్తూ శనివారం సర్క్యులర్ జారీ చేశారు. గడువు తేదీ వరకు ఆన్లైన్ క్లాస్లు మాత్రమే కొనసాగుతాయని పేర్కొన్నారు. శనివారం సాయంత్రం కేయూలోని అన్ని హాస్టళ్లకు తాళాలు వేశారు. దీంతో ఆదివారం వివేకానంద రీసెర్చ్ స్కాలర్స్ హాస్టల్ విద్యార్థులు క్యాంపస్లోని
అడ్మినిస్ట్రేషన్ బిల్డింగ్ఎదుట
ఆందోళనకు దిగారు. ఎంట్రన్స్వద్ద బైఠాయించి వీసీ తాటికొండ రమేశ్, రిజిస్ట్రార్ శ్రీనివాసరావుకు వ్యతిరేకంగా నినాదాలు చేశారు. పీహెచ్డీ అడ్మిషన్ల అవకతవకలపై ప్రశ్నిస్తున్నందునే తమపై కక్ష కట్టారని, అందుకే హాస్టల్వసతి లేకుండా చేసేందుకు వర్సిటీ ఆఫీసర్లు కుట్ర పన్నారని ఆరోపించారు.
పోలీసులను అడ్డుపెట్టుకుని హాస్టళ్లను ఖాళీ చేయిస్తున్నారని, పీహెచ్డీ అక్రమాలపై చేస్తున్న ఉద్యమాన్ని నీరుగార్చే కుట్ర చేస్తున్నారని మండిపడ్డారు. కరోనా సమయంలో ఆన్లైన్ క్లాస్ లు పెట్టారని, కానీ, ఇప్పుడు ఎందుకు పెడుతున్నారో అర్థం కావడం లేదన్నారు. రీసెర్చ్ స్కాలర్లు ఆఫ్లైన్ క్లాసులు అటెండ్ కాకుండా మెళకువలు ఎలా నేర్చుకోవాలో వీసీ సమాధానం చెప్పాలన్నారు.
ALSO READ :భద్రాచలం బీఆర్ఎస్లో చిచ్చు! .. తాతా మధు నియామకంపై గుర్రుగా మండల కమిటీలు
యూజీసీ రూల్స్తుంగలో తొక్కి, వర్సిటీల్లో ఒకటికి మించి పదవులను అనుభవిస్తున్న వారందరిపై చర్యలు తీసుకోవాలని ప్రభుత్వాన్ని డిమాండ్ చేశారు. ఎస్సీ, ఎస్టీ, బీసీలు, మైనార్టీ వర్గాల విద్యార్థులను చదువుకు దూరం చేసే కుట్రలో భాగంగానే హాస్టళ్లు క్లోజ్ చేశారని ఆగ్రహం వ్యక్తం చేశారు. వర్సిటీ ఆఫీసర్లు ఎమ్మెల్సీ పల్లా రాజేశ్వర్రెడ్డి చెప్పుచేతల్లో పని చేస్తున్నారని, ఇకనైనా రీసెర్చ్ స్కాలర్లను ఇబ్బందులు పెట్టడం మానుకోవాలని డిమాండ్ చేశారు. ఉద్యమాలు తమకు కొత్తకాదని, 24 గంటల్లోగా హాస్టళ్లను తెరిపించకపోతే ఆందోళనలు ఉధృతం చేస్తామని హెచ్చరించారు.
ఈ నిరసనలో యూనివర్సిటీ రీసెర్చ్ స్కాలర్స్ అసోసియేషన్(కుర్సా) అధ్యక్షుడు నరేశ్, ఎంఎస్ఎఫ్ జిల్లా ఇన్ఛార్జ్ భాస్కర్, పీడీఎస్యూ రాష్ట్ర ఉపాధ్యక్షుడు బి.నరసింహారావు, ఎంఎస్ఎఫ్ ఇన్చార్జి మధు, రీసెర్చ్స్కాలర్స్ మాదాసీ రమేశ్, గుండేటి సుమన్, సోమ రాజు, విష్ణు, గుండు సురేశ్, సాంబయ్య, సంపత్, జానకీరామ్, ఆశీర్వాదం, విజయ్, ఎలికట్టే సతీశ్, రంగు సతీశ్ పాల్గొన్నారు.
