గోడకు వేలాడదీసిన తుపాకీ కేసీఆర్..ఎప్పుడు పేలాలో ఆయనకు బాగా తెలుసు: కేటీఆర్

ఎప్పుడు పేలాలో.. ఎప్పుడు బయటకు రావాలో ఆయనకు బాగా తెలుసు: కేటీఆర్
కేసీఆర్ మాట్లాడినా, మాట్లాడకపోయినా సంచలనమే
దమ్ముంటే పది మంది ఎమ్మెల్యేలతో రాజీనామా చేయించాలి
ఉద్యమంలో పీసీసీ చీఫ్ ఎక్కడున్నడు?
అలాంటి వ్యక్తి ఉద్యమం గురించి మాట్లాడడం విడ్డూరం
తెలంగాణ భవన్లో నిర్వహించిన ‘దీక్షా దివస్’లో వ్యాఖ్యలు

హైదరాబాద్, వెలుగు: ఎదురుదాడి ఎప్పుడు చేయాలో.. ఎప్పుడు వెనకడుగు వేయాలో కేసీఆర్కు బాగా తెలుసని బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. ఏడాదిన్నరగా కేసీఆర్ సైలెంట్గా ఉంటున్నారని కొందరు అంటున్నారని, కనబడట్లేదు.. వినబడట్లేదంటూ కామెంట్లు చేస్తున్నారని పేర్కొన్నారు. కేసీఆర్ మాట్లాడినా సంచలనమే.. మాట్లాడకపోయినా సంచలనమేనని చెప్పారు. గోడకు వేలాడదీసిన తుపాకీ కూడా సైలెంట్గానే ఉంటుందని, దానిని బయటకుతీస్తే దాని కథేందో తెలుస్తుందని తెలిపారు. ఎప్పుడు పేలాలో.. ఎప్పుడు బయటకు రావాలో కేసీఆర్కు బాగా తెలుసన్నారు. శనివారం తెలంగాణభవన్లో నిర్వహించిన దీక్షా దివస్ కార్యక్రమంలో ఆయన పాల్గొన్నారు. తీన్ఫీట్ సీఎం తీస్మార్ఖాన్ లెక్క మాట్లాడుతున్నారని మండిపడ్డారు. ఈ రెండేండ్లలో కేసీఆర్ పేరు లేకుండా ఎప్పుడైనా సీఎం మాట్లాడిండా అని ప్రశ్నించారు. కానీ, కేసీఆర్ ఈ రెండేండ్లలో ఒక్కసారైనా రేవంత్ పేరు తీశారా అని చెప్పుకొచ్చారు. అందుకే నాయకుడు నాయకుడే.. అర్బకుడు అర్బకుడేనన్నారు. ఎన్ని పిల్లిమొగ్గలు.. ఎన్ని కుప్పిగంతులేసినా.. అవన్నీ హనుమంతుడి ముందు కుప్పిగంతుల్లాగానే ఉండిపోతాయని అన్నారు. సీఎం రేవంత్కు దమ్ముంటే పార్టీ మారిన పది మంది ఎమ్మెల్యేలతో రాజీనామా చేయించి రావాలని సవాల్ చేశారు.

ఉద్యమంలో ఆయనెక్కడున్నడు?

తెలంగాణ ఉద్యమ సమయంలో పీసీసీ అధ్యక్షుడు మహేశ్ కుమార్ గౌడ్ ఎక్కడున్నారో ఎవరికీ తెలియదని కేటీఆర్ అన్నారు. అలాంటి వ్యక్తి ఇప్పుడు తెలంగాణ ఉద్యమం గురించి, కేసీఆర్ దీక్ష గురించి అడ్డగోలుగా మాట్లాడుతున్నారని మండిపడ్డారు. ప్రాణం ముఖ్యమని, దీక్ష విరమించాలని కేసీఆర్ను నాడు కేంద్రం, రాష్ట్రంలోని కాంగ్రెస్ ప్రభుత్వం వేడుకున్నదని చెప్పారు. తెలంగాణ కథలో ముమ్మాటికి కాంగ్రెసే విలన్ అని విమర్శించారు. 60 ఏండ్ల సుదీర్ఘ కాలంలో ప్రతిసారీ తెలంగాణను ముంచిందే కాంగ్రెసేనన్నారు. కేసీఆర్ లేకుంటే తెలంగాణ లేదన్నది అక్షరసత్యమన్నారు. రాష్ట్ర ఏర్పాటు కోసం కేసీఆర్ దీక్షను తక్కువ చేసి అవమానకరంగా మాట్లాడితే సహించేది లేదని హెచ్చరించారు. తెలంగాణ బిడ్డల నెత్తురుతో కాంగ్రెస్ నేతల చేతులు తడిచాయని వ్యాఖ్యానించారు. హీరోలు మౌనంగా ఉంటే.. విలన్లు తామే హీరోలమంటూ పోజులు కొడతారని విమర్శించారు. అందుకే ఉద్యమంలో భాగమైన అందరూ ఆనాటి ఉద్యమ ఘట్టాలు, దీక్షా దివస్ ప్రాధాన్యాన్ని మరోసారి తెలియజేయాల్సిన అవసరం ఉందన్నారు. తెలంగాణ ప్రజలు ఉద్యమాల కోసం, ప్రజల కోసం నిలబడిన వీరులని, 60 ఏండ్ల పాటు బానిసలుగా ఉన్నది కాంగ్రెస్ నాయకులేనని పేర్కొన్నారు. తల్లి తెలంగాణను తీసేసి కాంగ్రెస్ బొమ్మను పెట్టుకున్నది ఆ కాంగ్రెస్ బానిసలేనని, అధికారంలోకి వచ్చాక సెక్రటేరియెట్ముందున్న రాజీవ్ గాంధీ విగ్రహాన్ని తీసేసి తల్లి తెలంగాణ విగ్రహాన్ని పెడతామని కేటీఆర్ అన్నారు.

ఉద్యమ చరిత్రను చాటి చెప్పాలి

ప్రతి 30 ఏండ్లకు ఒక తరం మారుతుందని, అన్ని తరాల వాళ్లకూ తెలంగాణ ఉద్యమ చరిత్రను చాటి చెప్పాల్సిన అవసరం ఉందని కేటీఆర్ అన్నారు. రామాయణ, మహాభారతాల్లోని అన్ని అంశాలూ ఇప్పటితరానికి గుర్తున్నాయంటే.. గత చరిత్రను పదే పదే మననం చేసుకోవడం వల్లేనన్నారు. ఇప్పుడు తెలంగాణ ఉద్యమానికి సంబంధించిన దశాబ్దాల చరిత్రను వచ్చే తరాలకూ తెలిసేలా చేయాల్సిన అవసరం ఉందన్నారు. తెలంగాణ ఉద్యమంలో అపూర్వఘట్టాలున్నాయన్నారు. చరిత్రను మలుపు తిప్పిన ఘట్టాల్లో కేసీఆర్ ఆమరణ దీక్ష ఒకటన్నారు. 11 రోజుల పోరాటంతో తెలంగాణలో ఉద్యమం పోటెత్తిందన్నారు. కేసీఆర్ దీక్ష వల్లనే తెలంగాణలోని సబ్బండ వర్గాలన్నీ కలిసి వచ్చి తెలంగాణ కావాలని కొట్లాడారన్నారు. కేసీఆర్ దీక్షకు దిగివచ్చి 2009 డిసెంబర్ 9న తెలంగాణ ఏర్పాటు చేస్తామని కాంగ్రెస్ ప్రకటించిందన్నారు. ఉద్యమంలో పట్టువిడుపులతో ముందుకు సాగిన కేసీఆర్ చాణక్యం వల్లే తెలంగాణ ఏర్పాటు సాధ్యమైందని, ఇందులో భాగంగా ఎన్నో పదవి త్యాగాలు, ఎన్నో రాజీనామాలు చేసిన పార్టీ బీఆర్ఎస్ అని అన్నారు. కేసీఆర్ దీక్ష చేపట్టిన నవంబర్ 29 దీక్ష దివస్ ఒక్క రోజే కాదని, దీక్షా దివస్ను దసరా, దీపావళిలాగా జరుపుకోవాలని పిలుపునిచ్చారు.