జగిత్యాల జిల్లా: విద్యుత్ షార్ట్ సర్క్యూట్‌తో పెంకుటిల్లు పూర్తిగా దగ్ధమైన ఘటన జగిత్యాల జిల్లాలోని ఎండపల్లి మండల కేంద్రంలో చోటుచేసుకుంది. ఈ ప్రమాదంలో ఇంట్లోని వస్తువులతో పాటు బంగారు, వెండి ఆభరణాలు, విలువైన డాక్యుమెంట్లు అగ్నికి ఆహుతయ్యాయి. సుమారు రూ.15 లక్షల వరకు ఆస్తి నష్టం జరిగినట్లు అంచనా వేస్తున్నారు.
ఎండపల్లి మండల కేంద్రానికి చెందిన దాసరి కొమురయ్య, కళ్యాణి దంపతుల పెంకుటిల్లులో షార్ట్ సర్క్యూట్ కారణంగా మంటలు చెలరేగాయి. క్షణాల్లో మంటలు ఇల్లంతా వ్యాపించడంతో ఇంట్లోని సామగ్రి పూర్తిగా కాలిపోయింది. బంగారు, వెండి ఆభరణాలతో పాటు కీలకమైన పత్రాలు కూడా అగ్నికి ఆహుతయ్యాయి. కళ్లముందే ఇల్లు, ఇంట్లోని వస్తువులన్నీ కాలిబూడిద కావడంతో బాధిత కుటుంబం తీవ్ర ఆవేదనకు గురైంది. జీవితకాలం కష్టపడి సంపాదించుకున్న వస్తువులన్నీ కోల్పోయి దిక్కుతోచని స్థితిలో పడింది. ఇల్లు లేకపోవడంతో కుటుంబం రోడ్డున పడింది.
ఈ అగ్నిప్రమాదంలో సుమారు రూ.15 లక్షల మేర ఆస్తి నష్టం వాటిల్లినట్లు అంచనా వేస్తున్నారు. సర్వం కోల్పోయిన తమ కుటుంబాన్ని ప్రభుత్వం ఆదుకోవాలని బాధితులు వేడుకుంటున్నారు. సంబంధిత అధికారులు ఘటనపై స్పందించి నష్టాన్ని అంచనా వేసి, ఇల్లు కోల్పోయిన తమకు ఆర్థిక సాయం అందించాలని కోరుతున్నారు.షార్ట్ సర్క్యూట్‌తో జరిగిన ఈ ప్రమాదం బాధిత కుటుంబాన్ని తీవ్ర విషాదంలోకి నెట్టింది.
