న్యూఢిల్లీ: ఎర్రకోట బాంబ్ బ్లాస్ట్ కేసుకు సంబంధించి ఐక్యరాజ్య సమితి సంచలన నివేదిక వెల్లడించింది. ఎర్రకోట బాంబ్ బ్లాస్ట్ వెనక పాక్ కేంద్రంగా ఉగ్రవాద కార్యకలాపాలు కొనసాగించే టెర్రరిస్ట్ గ్రూప్ జైష్-ఎ-మొహమ్మద్ (జెఎం) హస్తం ఉందని పేర్కొంది. ఐక్యరాజ్యసమితి విశ్లేషణాత్మక మద్దతు, ఆంక్షల పర్యవేక్షణ బృందం 37వ నివేదికలో ఈ విషయం వెల్లడైంది.
జైషే చీఫ్ మసూద్ అజార్ 2025, అక్టోబర్ 8న జమాత్-ఉల్-ముమినాత్ పేరుతో ప్రత్యేక మహిళా విభాగాన్ని ఏర్పాటు చేస్తున్నట్లు ప్రకటించాడని నివేదిక పేర్కొంది. ఎర్రకోట బ్లాస్ట్కు పాక్ కేంద్రంగా పని చేసే జైషే బాధ్యత వహించిందని ఇండియా యూఎన్కు తెలిపింది. ఇక, పాక్ తనకు అలవాటైన అబద్ధాలనే మళ్లీ పునరావృతం చేసింది. పాకిస్థాన్లో జైషే, లష్కరే తోయిబా ఉగ్ర సంస్థలు యాక్టివ్గా లేవని చెప్పింది.
ఎర్రకోట బాంబ్ బ్లాస్ట్:
2025, నవంబర్ 11న భారీ పేలుడుతో దేశ రాజధాని ఢిల్లీ ఒక్కసారిగా ఉలిక్కిపడిన విషయం తెలిసిందే. ఎర్రకోట మెట్రో స్టేషన్ సమీపంలోని ట్రాఫిక్ సిగ్నల్ దగ్గర ఓ కారులో భారీ పేలుడు సంభవించింది. ఈ ఘటనలో 15 మంది మృతి చెందగా.. పదుల సంఖ్యలో ప్రజలు గాయపడ్డారు. యావత్ దేశాన్ని కుదిపేసిన ఈ ఘటనను ఉగ్రదాడిగా ప్రకటించిన కేంద్ర ప్రభుత్వం.. కేసు విచారణను జాతీయ దర్యాప్తు సంస్థ ఎన్ఐఏకి అప్పగించింది.
ఈ కేసును అత్యంత ప్రతిష్టాత్మకంగా తీసుకున్న ఏన్ఐఏ విచారణ వేగవంతం చేసింది. పేలుడు వెనుక ఉన్న మొత్తం నెట్వర్క్ను విచ్ఛిన్నం చేయడానికి వివిధ రాష్ట్ర పోలీసు విభాగాలతో సమన్వయం చేసుకుంటూ ముందుకుపోతుంది. ఈ కేసులో ఇప్పటికే పలువురు నిందితులను ఎన్ఐఏ అరెస్ట్ చేసింది.
