- నిర్వాసితుల గోడు పట్టదా?
- ఇబ్బందులు పడుతున్న మిడ్ మానేరు ప్రాజెక్టు ముంపు బాధితులు
- సమస్యల పరిష్కారానికి పొన్నం 11 కిలోమీటర్ల పాదయాత్ర
వేములవాడ, వెలుగు: మిడ్ మానేరు ప్రాజెక్ట్ పూర్తై ఏండ్లు గడుస్తున్నా ముంపు గ్రామాల్లో సమస్యలు పరిష్కారం కాలేదని మాజీ ఎంపీ పొన్నం ప్రభాకర్ అన్నారు. మిడ్ మానేరు 12 ముంపు గ్రామాల సమస్యలు పరిష్కరించాలంటూ కాంగ్రెస్ పార్టీ ఆధ్వర్యంలో ఆదివారం రాజన్న సిరిసిల్ల జిల్లా వేములవాడ అర్బన్ మండలం సంకెపల్లి నుంచి చింతలఠాణా వరకు 11 కిలోమీటర్ల మేర పాదయాత్ర చేపట్టారు. ఈ సందర్భంగా పొన్నం ప్రభాకర్, పీసీసీ కార్యదర్శి ఆది శ్రీనివాస్ మాట్లాడారు. మిడ్ మానేరు ప్రాజెక్టు ముంపు గ్రామాల సమస్యలు పరిష్కరించకుండా గ్రామాలకు వస్తే అధికారంలో ఉన్న టీఆర్ఎస్ నాయకులను తరిమి కొట్టాలన్నారు. సీఎం కేసీఆర్ 2015 జూన్18న వేములవాడ రాజన్న ఆలయం సాక్షిగా నిర్వాసితులకు ఇస్తానన్న రూ. 5 లక్షల హామీని వెంటనే అమలు చేయాలని డిమాండ్ చేశారు. ముంపు గ్రామాలవారికి కేంద్ర, రాష్ట్ర ప్రభుత్వాలు ఉపాధి అవకాశాలు కల్పించాలన్నారు. సమస్యలు పరిష్కారమయ్యేవరకు ముంపు గ్రామల ప్రజలకు అండగా ఉంటామన్నారు. కార్యక్రమంలో కాంగ్రెస్ పార్టీ జిల్లా అధ్యక్షుడు నాగుల సత్యనారాయణ, అర్బన్మండల అధ్యక్షుడు పిల్లి కనుకయ్య తదితరులు పాల్గొన్నారు.
