అవసరాల నుంచే కొత్త పరికరాలెన్నో పుట్టుకొస్తాయి. గొనెల శ్రీకాంత్ విషయం లోనూ అదే జరిగింది. తన చుట్టూ ఉన్న జనాల అవసరం అతడ్ని ఆలోచింపజేసింది. ట్రావెలింగ్ మినీ కూలర్ తయారీకి కారణమయ్యింది. అందరి చేత భేష్ అనిపించుకునేలా చేసింది. కేవలం 2 రోజుల్లోనే 500 రూపాయలతో మినీ కూలర్ తయారు చేసిన ఇతని గురించి మరిన్ని విషయాలు..
కోరుట్ల,వెలుగు: జగిత్యాల జిల్లా కోరుట్లకు చెందిన శ్రీకాంత్ ఏడేళ్ల క్రితం డిగ్రీ పూర్తిచేశాడు. ఆ తర్వాత సొంతంగా శ్రీ వినాయక ఎలక్ట్రిక్ అండ్ వైండింగ్ వర్క్ షాప్ పెట్టుకున్నాడు. చిన్నప్పట్నించీ శ్రీకాంత్కి ఎక్స్పెరిమెంట్స్ చేయడం అంటే చాలా ఇష్టం. ఆ ఇష్టంతోనే రీసెంట్గా మినీ కూలర్ తయారుచేశాడు. అది కూడా చాలా తక్కువ ఖర్చుతో.
ఎలా తయారుచేశాడంటే...
15 కిలోల ఖాళీ వంట నూనె డబ్బా తీసుకుని దానికి చిన్న మోటార్ బిగించాడు. రెండున్నర లీటర్ల నీరు లోపలికి బయటికి రావడానికి ప్లాస్టిక్ వాటర్ పైపులు కనెక్ట్ చేశాడు. వాటికి రెండువైపులా ఇనుప జాలీ బిగించి, వాటికి గడ్డిని అమర్చాడు. మోటార్ తిరగడానికి కరెంట్ వైరు కనెక్షన్ ఇచ్చి, ట్రావెలింగ్ మినీ కూలర్ తయారుచేశాడు. 12 ఇంచులు పొడవు, 9 ఇంచుల వెడల్పు ఉన్న ఈ కూలర్ ఎక్కడికైనా వెంటతీసుకెళ్లొచ్చు. ముఖ్యంగా ఫంక్షన్లు, పార్టీలకి, హాస్పిటల్స్లో రోగులకి, పేదలకి ఈ కూలర్ చాలా ఉపయోగపడుతుందని చెప్తున్నాడు శ్రీకాంత్. తగిన ప్రోత్సాహం అందిస్తే మరిన్ని ప్రయోగాలు చెయడానికి రెడీ అంటున్నాడు.