- అభివృద్ధి పనుల్లో వేగం పెంచాలి
- భక్తులకు ఇబ్బందులు కలగకుండా చర్యలు తీసుకోవాలి
- మంత్రులు పొంగులేటి శ్రీనివాస్‌‌‌‌‌‌‌‌రెడ్డి, సురేఖ, సీతక్క ఆదేశం
ములుగు/తాడ్వాయి, వెలుగు : మేడారంలో జరుగుతున్న అభివృద్ధి పనులను జనవరి 3లోగా పూర్తి చేయాలని మంత్రి పొంగులేటి శ్రీనివాస్‌‌‌‌‌‌‌‌రెడ్డి ఆదేశించారు. అభివృద్ధి పనుల్లో వేగం పెంచాలని, సమ్మక్క, సారలమ్మ దర్శనానికి వచ్చే భక్తులకు ఇబ్బందులు కలగకుండా చర్యలు తీసుకోవాలని సూచించారు. శుక్రవారం ఆయన మంత్రులు కొండా సురేఖ, సీతక్క, ఎంపీ పోరిక బలరాంనాయక్‌‌‌‌‌‌‌‌తో కలిసి మేడారంలో పర్యటించారు.
ముందుగా అమ్మవార్లను దర్శించుకొని మొక్కులు చెల్లించుకున్నారు. అనంతరం సమ్మక్క, సారలమ్మల గద్దెల చుట్టూ జరుగుతున్న పనులతో పాటు మాస్టర్‌ ప్లాన్‌‌‌‌‌‌‌‌లో భాగంగా గద్దెల విస్తరణ, మంచెల ఏర్పాటు, గోవిందరాజులు, పగిడిద్దరాజుల గద్దెల పునఃనిర్మాణ పనులను పరిశీలించారు. ఈ సందర్భంగా పొంగులేటి మాట్లాడుతూ.. గ్రానైట్‌ రాళ్ల అమరిక పటిష్టంగా ఉండేలా చూడాలన్నారు. జాతర సమయం దగ్గర పడుతున్న నేపథ్యంలో పనులు ముమ్మరం చేయాలని, నాణ్యతలో రాజీ లేకుండా పనులు పూర్తి చేయాలని సూచించారు.
స్థానిక ఎన్నికల కారణంగా ఆఫీసర్లు బిజీగా ఉన్నప్పటికీ మేడారం పనులపై ప్రత్యేక దృష్టి సారించాలన్నారు. ఆదివాసీ, గిరిజనుల సంప్రదాయాలను గౌరవిస్తూ, వారి ఆమోదంతోనే మాస్టర్‌ ప్లాన్‌ పనులు చేపడుతున్నట్లు చెప్పారు. ఈ పనులు వందల ఏండ్లు నిలిచిపోతాయని ఆశాభావం వ్యక్తం చేశారు. ఆదివాసీల సంస్కృతి, సంప్రదాయాలను ప్రపంచానికి చాటుతూ, వారి అస్తిత్వం కాపాడుకుంటూ భక్తుల విశ్వాసం దెబ్బ తినకుండా పనులు పూర్తి చేస్తామని చెప్పారు.
అనంతరం జంపన్న వాగుతో పాటు స్థూపం నుంచి బస్టాండ్‌ వరకు జరిగే రోడ్డు విస్తరణ పనులను పరిశీలించారు. జంపన్న వాగు అభివృద్ధి, సుందరీకరణకు ప్రపోజల్స్‌ సిద్ధం చేశామని చెప్పారు. కార్యక్రమంలో గ్రంథాలయ సంస్థ చైర్మన్‌ బానోతు రవిచందర్, వ్యవసాయ మార్కెట్‌ కమిటీ చైర్‌‌‌‌‌‌‌‌పర్సన్‌ రేగ కళ్యాణి, మేడారం ట్రస్ట్‌ బోర్డ్‌ చైర్మన్‌ అరెం లచ్చు పటేల్, ఎర్రబెల్లి మనోజ్‌‌‌‌‌‌‌‌కుమార్‌ పాల్గొన్నారు.
